އައްޑޫގައި ކޮވިޑަށް ޓެސްޓު ކުރެވޭނެ އިންތިޒާމު ހަމަޖައްސައިދިނުމަށް ގޮވާލައިފި
މާލެ ފިޔަވައި ރާއްޖޭގައި އެންމެ ބޮޑު އާބާދީއެއް އޮތް އައްޑޫގައި ކޮވިޑް-19 އަށް ޓެސްޓު ކުރެވޭނެ އިންތިޒާމު ހަމަޖައްސައިދިނުމަށް މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
އައްޑޫން ރޭ ފަރުވާއަކަށް މާލެ ގެންދިޔަ މީހަކު ކޮވިޑް-19 އަށް ފައްސިވެގެން މިހާރު އަންނަނީ ފަރުވާ ދެމުންނެވެ. އަދި މިއާއެކު އައްޑޫގައި މިހާރު ވަނީ ކޮންޓްރެކްޓް ޓްރޭސިންގެ މަސައްކަތް ފަށައި 14 ދުވަހަށް ލޮކްޑައުން ކޮށްފައެވެ.
މިކަމާ ގުޅިގެން ޝަރީފް ކުރެއްވި ޓްވީޓެއްގައި ވިދާޅުވީ އައްޑު ސިޓީގައި ކޮވިޑް ޓެސްޓު ހެދޭނެ ގޮތް އާޖެންޓުކޮށް ގާއިމް ކުރުމަކީ މުހިންމު ވަރަށް ބޮޑު ވެއްޖެ ކަމަށެވެ.
"މިއީ އަވަސް ފިޔަވަޅު އަޅަން ޖެހޭ ކަމެއް." ޝަރީފް ވިދާޅުވިއެވެ.
Addu City ge Hospital ga Covid test hedheyne goi urgent koh qaaimu kurumuge muhimmu varah bodu vejje. Mee avas fiyavalhu alhan jehey kameh @ameenex @HPA_MV
— Ibrahim Shareef (@AdduShareef) May 9, 2020
ޝަރީފް މިހެން ވިދާޅުވެފައިވާއިރު، އައްޑޫގައި ކޮވިޑް-19 އަށް ޓެސްޓްނުކުރެވޭތީ އާއި އެ ބައްޔަށް ހާއްސަކޮށްގެން އައްޑޫގައި ތައްޔާރުކުރަން ބުނި ހޮސްޕިޓަލްގެ މަސައްކަތް އެކަށީގެންވާ ގޮތަކަށް ކުރިއަށް ނުދާތީ، ކުރިއަށް ލޯކަލް ކައުންސިލް އިންތިހާބުގައި އެމްޑީީޕީގެ ޓިކެޓްގައި އައްޑޫގައި މޭޔަރު ކަމަށް ވާދަކުރައްވާ އަލީ ނިޒާރު ވަނީ ކަންބޮޑުވުން ފާޅު ކުރައްވާފައެވެ.
