އައްޑޫ ކޮވިޑް19 ނެތް ތަނަކަށް ހެދުމުގައި އެސްއެސްޑީ ވަރެއްނެތް
ކޮވިޑް19 ގެ ބިރުވެރިކަން ރާއްޖެ ވެސް މިދަނީ ދެކެމުންނެވެ. އިންތިހާދަރަޖައިގެ ގައިދުރުކަމާއެކު ފަންނީ މީހުންގެ އިރުޝާދުތަކާއި އެއްގޮތަށް ގިނަބަޔަކު އަމަލުކުރުމުގެ ނަތީޖާ ވެސް ގޯހެއް ނޫނެވެ. ހުސްވި މޭމަހުގެ 30ވަނަ ދުވަހަކީ އެއްދުވަހެއްގައި އެންމެ ގިނަބަޔަކު ކޮވިޑް19އަށް ފައްސިވާނެކަމަށް ބެލުނުދުވަހެވެ. 1600 މީހުން އެދުވަހު އެކަނިވެސް ރާއްޖޭގައި ފައްސިވާނެކަމަށް އަންދާޒާކުރެވުނެވެ. އެހެންނަމަވެސް އެއަންދާޒާ ޙަޤީޤަތަކަށް ނުވިއެވެ. ފެށުނީއްސުރެ އެދުވަހުގެ ނިޔަލަށް މުޅިރާއްޖެއިން އެބައްޔަށް ފައްސިވީ 1672 މީހުންނެވެ. ﷲއަށް ޙަމްދުހުއްޓެވެ.
މިހެން މިވީ ކީއްވެގެންހެއްޔެވެ. ފަންނީގޮތުން ލަފާކުރި ކުރުން ގޯސްވީހެއްޔެވެ.ނޫނެކެވެ. އެގޮތަށް ލަފާކުރެވުނީ އެކަށީގެންވާ ރައްކާތެރިކަމުގެ ފިޔަވަޅު ނޭޅިއްޖެ ހާލަތެއްގައި ކަންވާނެގޮތަށް ރިޢާޔަތްކޮށެވެ. އެކަމަކު ބައެއްކަންކަން އެންމެ ރަނގަޅަށް ނުދިޔަ ނަމަވެސް ރައްކާތެރިވުމުގެ ގިނަ ފިޔަވަޅުތައް އެޅުނީ ހަމަ ރަނގަޅަށެވެ. ލިބުނު އިރުޝާދުތަކާއި އެއްގޮތަށް ގިނަބަޔަކު ބަސް އެހުމުގެ ނަތީޖާ ފެނުނީ ވެސް އެހާ ރަނގަޅަށެވެ. އިޖުތިމާއީ ގައިދުރުކަމުގެ ނަތީޖާ ހަމަރަނގަޅީއެވެ.
މާލޭގައި ބަލިފެތުރެން ފަށައިފިނަމަ ހިފަހައްޓާ ނުލެވިދާނެކަމުގެ ބިރު ފެށުނު ހިސާބުއްސުރެ ވެސް އޮތެވެ. މަސްހުނިކޮށް އުޅޭ ބިދޭސީންގެ ތެރޭގައި ފެތުރެން ފަށައިފިނަމަ އޮބިނޯންނާނެކަމަށް އަންދާޒާ ކުރެވުނު ވެސް މެއެވެ. ޙަޤީޤަތުގައި އެކަންވީ ވެސް އެހެންނެވެ. މާލޭގައި ފެތުރެން ފެށުމާއެކު އަތޮޅުތަކަށް ނުރައްކާ ބޮޑުވާނެކަން އެންމެންނަށްވެސް އެނގެއެވެ. އެކަމަށް އަތޮޅުތަކުން އިންތިހާ ދަރަޖައަށް ތިބީ ހޭލައެވެ. ޓާސްކްފޯސްތައް ހަދައިގެން އެބައެއްގެ ރަށުގެ ރައްޔިތުން މިނުރައްކާތެރިވަބާއިން ސަލާމަތްކުރަން ހިލޭސާބަހަށް ގިނަބަޔަކު މަސައްކަތްފެށިއެވެ.
މާލެ ފިޔަވައި އެންމެ އާބާދީ ބޮޑު އައްޑޫ ސިޓީ އެކަމުގައި ނަމޫނާއަކަށް ފުދެއެވެ. ސިތީކައުންސިލުން ދުރާލާ ހަރުދަނާ ފިޔަވަޅުތައް އަޅަންފެށިއެވެ. ނަތީޖާއެއްގެ ގޮތުން އެޗްޕީއޭއާއި އައްޑޫސިޓީ ކައުންސިލާ ދެމެދު ޚިޔާލުތައް ފުށުއަރާ ހާލަތާނުބައްދަލު ކަމަށް ބުނެ ބައެއްކަންކަން ހުއްޓުވަން ވެސް ދިމާވިއެވެ. އައްޑޫއަކީ ގިނަރަށްތަކަކުން ގުޅިފައިވާ ސިޓީއެއްކަމުން އެއްރަށުންވެސް ބަލީގެ އަސަރު ފެނިއްޖެނަމަ މުޅިސިޓީ ޚަރާބުވާނެކަން އެވެރިން ދަނެއެވެ. ހަމައެހެންމެ އައްޑޫ ސިޓީއަކީ މީސްގިނަ ތަނަކަށް ވާފަދައިން ބިދޭސީ މަސައްކަތު މީހުން ވެސް އެހާގިނަ ތަނެކެވެ. މިހުރިހާކަންކަމަށް ސިޓީކައުންސިލް އޮތީހޭލައެވެ. އެމަޖެންސީ އޮޕަރޭޝަން ސެންޓަރު ޤާއިމު ކޮށްގެން ކޮވިޑް19 އާއި ދެކޮޅަށް މުޅިއައްޑޫ ހަރަކާތްތެރިކުރުވަމުން ދަނީ އަވަށްތަކަށް ވަރަށް ބޮޑަށް ބާރުތައް ދީގެންނެވެ. ކޮންމެ އަވަށެއްގައި އަވަށުގެ ކަންކަން މޮނިޓަރކޮށް ބެލެހެއްޓުމަށް ސޯޝަލް ސަޕޯޓް ޑެސްކެއް އުފައްދާ 24 ގަޑިއިރު އަވަށުގެ ކަންކަން ރަނގަޅު ތަރުތީބުގައި ހިފެހެއްޓުމަށް ގިނަގުނަ މަސައްކަތްތަކެއް ކުރެވެން ފެށިއެވެ.
އަވަށުގެ ސޯސަލް ސަޕޯޓު ޑެސްކަކީ އައްޑޫގައި ކޮވިޑް19 އާއި ދެކޮޅަށް ހިންގާ ހަރަކާތުގެ ނާރެހެވެ. އެޗްޕީއޭގެ ގައިޑްލައިނާ އެއްގޮތަށް ރައްޔިތު މީހާއާއި ހަމައިން ކުރަން ޖެހޭ ހުރިހާކަމެއް ކުރުވުމުގެ އާރުކާޓީއެވެ. ޑެލިވަރީ ނިޒާމުން ފެށިގެން ރަށަށް އެތެރެވާ މީހުންނާއި ތަކެއްޗާއި ވަކިވަކިން ދެނެގަނެ ޑިސް އިންފެކްޓްކުރަން ޖެހޭ ތަކެއްޗާއި ތަންތަން ޑިސްއިންފެކްޓްކުރަނީ އެޑެސްކުންނެވެ. ގައިދުރުކަން ހިފެހެއްޓުވުމާއެކު ބޭސްސިޓީއަށް ބޭސް ހޯދާދިނުމާއި އެހެނިހެން ބަލިމީހުން ޑޮކްޓަރަށް ދެއްކުމާއި ފަރުވާ ދިނުމުގެ އިންތިޒާމު ހިފަހައްޓަނީ އެވެރިންނެވެ. ފިހާރަތަކުގައި މުދާ ހުންނަ މިންވަރާއި ކާބޯތަކެއްޗަށް ރައްޔިތުން ޖެހުނަނުދޭން ކުރެވެން ހުންނަ ކަންކަން ރާވާ އިންތިޒާމުކުރުމުގައިވެސް އެޑެސްކުގެ ދައުރު ބޮޑެވެ. ހޯމްކަރަންޓީނުގައި ބައިތިއްބަން ޖެހޭ މީހުންގެ ކަންކަން އެންމެ ކައިރިން ބަލަނީވެސް އެޑެސްކުންނެވެ. ވިއްސާރަވެ ރަށުތެޜޭގައި ފެންބޮޑުވެ އެހީތެރިކަން ބޭނުންވީ ދަނޑިވަޅުގައި ވެސް އޮތީ އެސްއެސްޑީއެވެ. އަވަށުގެ ރައްޔިތުން ހޭލުންތެރިކުރުވުމާއި ދުވަހުން ދުވަހަށް ދޭންޖެހޭ ހުރިހާ މައުލޫމާތެއް ފޯރުކޮށްދިނުމުގައިވެސް ފުރިހަމައެވެ. ކޮވިޑް19 އާއިއެކުގައި ދިރިއުޅުމުގެ އާދަތައް ބެހެއްޓުމަށް ކުރަންޖެހޭ ކަންކަން ކުރުމުގައި އަމަލީ ހަރަކާތްތެރިއަކީ އައްޑޫގައި ސޯޝަލް ސަޕޯޓު ޑެސްކުތަކެވެ.
ކޮވިޑް19 ނެތްތަނަކަށް އައްޑޫ ސިޓީ ހެދުމަށް ސޯޝަލް ސަޕޯޓު ޑެސްކުތަކުން ކުރާމަސައްކަތަށް ކުރުނީސްކުރެވެއެވެ. ކަމެއްކާމިޔާބު ކުރުމުގައި އިޖުތިމާޢީ ގޮތުންކުރެވޭ މަސައްކަތުގެ ނަތީޖާ މާފޮންޏެވެ. އިޖުތިމާއީ ޚިދުމަތްތެރިން އެމަސައްކަތް އެކުރަނީ ހިލޭސާބަހަށެވެ. އެކަމުގައި މުޖުތަމަޢުގެ ސަލާމަތާ ރައްކާތެރިކަންނޫން އެހެން ކަމެއްނެތެވެ. ޤައުމީ މަސައްކަތަކީ އެއީއެވެ. މެޑެލްދޭންވީ ވެސް މިފަދަ ޚިދުމަތްތެރިންނަށެވެ.
