ފުލުހުންނަށް ފޯނު ދޭން އިންކާރުކޮށް އެ ފޯނު ހަލާކު ކޮށްލި ހަރުކަށި ފިކުރުގެ މީހަކު ޖަލަށް!
ސަލްޓަން ޕާކުގައި ބޮން ގޮއްވާލި މައްސަލާގައި ހައްޔަރުކުރުމަށް ފަހު ދޫކޮށްލި މީހެއްގެ މައްޗަށް އެހެން ކުށެއް ސާބިތުވެ އެއް އަހަރަށް ޖަލަށް ލުމަށް އިއްޔެ ހުކުމް ކޮށްފި އެވެ.
ޖަލަށް ލާން ހުކުމް ކޮށްފައިވަނީ 2007 ވަނަ އަހަރު ސަލްޓަން ޕާކްގައި ބޮން ގޮއްވި މައްސަލާގައި ކުރިން ހައްޔަރުކުރުމަށް ފަހު ދޫކޮށްފައި ހުރި އަބްދުއްލަތީފް އިބްރާހިމެވެ.
އޭނާ ހައްޔަރުކުރަން ދިޔައީ، މާފުށީ ޖަލުގައި ބަންދުކޮށްފައި ތިބި ހަރުކަށި ފިކުރަށް ތާއީދުކުރާ ބަޔަކު ރާވަމުންދިޔަ ކަމެއްގެ ތަހުގީގަށެވެ. އެނގިފައިވާ ގޮތުގައި ޖަލުގައި ތިބި މީހުން ގައުމީ ސަލާމަތަށް ނުރައްކާވާފަދަ ކަމެއް ރާވަމުންދާ ކަމުގެ މައުލޫމާތު ލިބިގެން، އެކަމާ ގުޅިގެން އަބްދުއްލަތީފް ހައްޔަރުކުރަން ދިއުމުން އޭނާ ވަނީ ފޯނު ފުލުހުނަށް ނުދީ ހަލާކު ކޮށްލާފައެވެ.
އެމައްސަލާގައި ދެން ދައުލަތުން ދައުވާ އުފުލީ އަދުލު އިންސާފު ގާއިމުކުރުމަށް ހުރަސް އެޅި ކަމުގެ ދައުވާއެވެ. ގަމު މެޖިސްޓްރޭޓް ކޯޓުގައި ބެލި މިމައްސަލަ ލަތީފާ ދެކޮޅަށް ނިމި އޭނާ ވަނީ އެއް އަހަރަށް ޖަލަށް ލުމަށް ހުކުމް ކޮށްފައެވެ.
ސަލްޓަން ޕާކުގައި ބޮން ގޮއްވި މައްސަލާގައި ފުލުހުން ތުހުމަތުކުރި 10 މީހަކު ގައުމު ދޫކޮށް ފިލައިގެން ދިޔައެވެ. އޭގެތެރެއިން ފެނުނީ ފަސް މީހުންނެވެ. ޚަބަރު ލިބޭ ގޮތުގައި ނުފެނުނު މީހުން ފަހުން ބައިވެރިވިވީ ބޭރުގައި ކުރާ މިފަދަ ހަރުކަށި ފިކުރަށް ނިސްބަތްވާ ޖަމާއަތްތަކުގެ ހަނގުރާމަތަކުގައެވެ.
Ads by STO
