11 އަހަރުގެ ކުއްޖާ ރޭޕްކުރި ކަމަށް ތުހުމަތު ކުރެވޭ މީހާގެ މައްޗަށް ތިން ދައުވާއެއް އުފުލައިފި!

މާލޭގެ ގެސްޓްހައުސް އެއްގައި، 11 އަހަރުގެ ކުޑަ ކުއްޖަކު ގްރޫމް ކޮށްގެން ގެންގޮސް ރޭޕްކުރި ކަމަށް ތުހުމަތު ކުރެވޭ މީހާގެ މައްޗަށް ތިން ދައުވާއެއް އުފުލައިފިއެވެ.

Ads by Sosun Fihaara

މިމައްސަލައިގައި ދައުވާ އުފުލާފައިވަނީ ހއ.ބާރަށް، ސިލްސިލާގޭ/ އަނީސް ހިލްމީ ގެ މައްޗަށެވެ.

ޕަބްލިކް ޕްރޮސެކިއުޓާ އަޙުމަދު ޝަފީއު ވިދާޅުވީ، އަނީސްގެ ފޯނު ބަލައި ޗެކްކުރިއިރު އޮރިޔާން މަންޒަރު ދައްކުވައިދޭ ފޮޓޯއާއި ވީޑިއޯ ވެސް ފެނިފައިވާ ކަމަށެވެ.

އަނީސް ގެ މައްޗަށް އުފުލާފައިވާ ދައުވާ ތަކަކީ:

▪︎ ކުޑަކުއްޖެއްގެ ހަށިގަނޑުގައި ޖިންސީ ނިޔަތެއް އޮވެގެން ގަސްދުގައި އަތްލުމުގެ ކުށުގެ ދައުވާ (މިދައުވާ ގެ އަދަބަކީ 10-14 އަހަރުގެ ޖަލު ހުކުމެއް)

▪︎ ކުޑަކުއްޖަކަށް ޖިންސީ ގޯނާކުރުމަށްޓަކައި އެކުއްޖާ ގްރޫމްކުރުމުގެ ކުށުގެ ދައުވާ (މިދައުވާގެ އަދަބަކީ 10 އަހަރުގެ ޖަލު ހުކުމެއް)، އަދި

▪︎ އޮރިޔާންކާޑު ގެންގުޅުމުގެ ކުށުގެ ދައުވާ (މިދައުވާގެ އަސާސީ އަދަބަކީ އެއް މަހާއި 6 ދުވަހުގެ ޖަލު ހުކުމެއް) މިއެވެ.

މިދިޔަ ޖޫން މަހުގެ 10 ވަނަ ދުވަހު ކުޑަ އަންހެން ކުއްޖަކު ގްރޫމް ކޮށްގެން މާލޭގެ ގެސްޓްހައުސް އަކަށް ގެންގޮސް ރޭޕްކުރި ކަމުގެ ތުހުމަތުގައި ކޯޓު އަމުރެއްގެ ދަށުން އަނީސް ހައްޔަރު ކުރީ އެމަހުގެ 12 ވަނަ ދުވަހުގެ ރޭ، އޭނާ ދިރިއުޅޭ ގެއިންނެވެ.