ބޮޑުފިނޮޅުން ބިދޭސީން ބޭލުމަށް ވަގުތީ އަމުރަކަށް އެދެފި
ބ. އަތޮޅުގައި ރިސޯޓް ތަރައްގީ ކުރަމުންދާ ރަށް، ބޮޑުފިނޮޅުގައި ތިބި ބިދޭސީން އެ ރަށުން ބާލަން ވަގުތީ އަމުރެއް ނެރެދިނުމަށް ސީލް މޯލްޑިވްސް ޕްރައިވެޓް ލިމިޓެޑްގެ ފަރާތުން ތުޅާދޫ މެޖިސްޓްރޭޓަށް ހުށަހަޅައިފި އެވެ.
އެ ކުންފުނިން މިއަދު ބުނީ އެ މައްސަލައިގެ އަޑު އެހުމެއް އޮންލައިންކޮށް މިއަދު ބާއްވަން ތާވަލްކޮށްފައިވާ ކަމަށެވެ.
މުސާރަ ނުދީ މަސައްކަތް ކުރުވި މައްސަލައިގައި ބިދޭސީން ވަނީ ބޮޑުފިނޮޅުގައި ދިވެހިންތަކެއް ރަހީނުކޮށް، ރަށުގެ ތަކެއްޗަށް ގެއްލުންދީ ފުލުހުންނާ ވެސް ކުރިމަތިލައިފަ އެވެ. މި މައްސަލައިގައި 19 ބިދޭސީއަކު ހައްޔަރުކޮށް ބަންދުގެ މުއްދަތު ވަނީ ޖަހައިފަ އެވެ.
އެ މައްސަލާގައި ސީލް މޯލްޑިވްސްގެ ވަކީލުން ވަނީ އެ ކުންފުނީގެ މުދަލަށް ލިބުނު ގެއްލުންތަކުގެ ބަދަލު ނަގައިދިނުމަށް ހުށަހެޅިދާނެތޯ ކަނޑައެޅުމަށް މިދިޔަ ހޯމަ ދުވަހު ވަނީ ތުޅާދޫ ކޯޓަށް މައްސަލައެއް ހުށަހަޅައިފަ އެވެ. އަދި އެ މައްސަލާގައި ސީލް މޯލްޑިވްސްގެ ފަރާތުން އެދިފައި ވަނީ ގެއްލުން ދިން ބިދޭސީން ތިބެގެން އެ ކަންކަން ބެލުމުގެ މަސައްކަތް ކުރިޔަށް ގެންދަން އުނދަަގޫވާ ކަމަށާއި އެހެން ކަމުން ރިޒް ކުންފުނީގެ ބިދޭސީންތައް ބޮޑުފިނޮޅުން ބާލަން އަމުރެއް ނެރެދިނުމަށެވެ.
އެ މީހުންނަކީ ގަވާއިދާ އެއްގޮތަށް އަދި ހުރިހާ ލިޔުންތަކެއް ހަމައަށް ތިބި ބައެއް ކަމަށާއި އެކަމަކު އެހެން ކުންފުންޏެއްގެ ކޯޓާގައި ތިބި މުވައްޒަފުންތަކަކާ ހަވާލުވުމުގެ ކުރިން އެއީ ކޮން ބައެއްގެ މުވައްޒަފުން ކަން ކަށަވަރު ކުރަން ބޭނުންވާ ކަމަށާއި އެކަން ސާފުކުރަން ފުލުހުންގެ ކިބައިން އެދިފައިވާނެ ކަމަށް ރިޒްގެ ވަކީލުން ވަނީ ވިދާޅުވެފަ އެވެ.
