އިއުތިރާފް އެއްބަސްވުން ހެދީ ބޭރަށް ފޮނުވަން އެއްބަސްވުމުން: އަދީބު
ޚިޔާނާތުގެ މައްސަލާގައި ކުށަށް އިއުތިރާފްވުމުގެ އެއްބަސްވުމެއްގައި ދައުލަތާ އެކު ސޮއިކުރީ ބޭސްފަރުވާ އަށް ރާއްޖެއިން ބޭރަށް ފޮނުވަން އެއްބަސްވުމުން ކަމަށް ކުރީގެ ނައިބު ރައީސް އަހުމަދު އަދީބު މިއަދު ކްރިމިނަލް ކޯޓުގައި ވިދާޅުވެއްޖެ އެވެ.
އެމްއެމްޕީއާރުސީގެ ޚިޔާނާތާ ގުޅިގެން އަދީބުގެ މައްޗަށް ހަތް ދައުވާއެއް ދައުލަތުން ކޮށްފައިވާއިރު އަދީބު ވަނީ އެ ކޮރަޕްޝަންގައި ޝާމިލްވި ކަމަށް އިއުތިރާފުވެ، ދައުލަތާއެކު މިދިޔަ އަހަރު އެއްބަސްވުމެއްގައި ސޮއި ކުރައްވާފަ އެވެ. އެގޮތުން އެއްބާރުލުން ދިނުމުގެ އެއްބަސްވުމަކާއި އިއުތިރާފު އެއްބަސްވުމެއްގައި ސޮއި ކުރެއްވި އެވެ.
އެ މައްސަލާގައި މިއަދު ބޭއްވި އަޑުއެހުމުގައި، މައްސަލަ ބައްލަވާ ގާޒީ އެ އެއްބަސްވުމާ ގުޅޭގޮތުން ސުވާލު ކުރެއްވުމުން ދައުލަތުން ބުނީ އެއްބާރުލުން ދިނުމުގެ އެއްބަސްވުމެއް ހެދީ އަދީބު އެގޮތަށް ބޭނުންވާތީ ކަމަށެވެ. އަދި ފަހުން ޖިނާއީ އިޖްރާއާތުގެ ގާނޫނުގައި ބުނާ ފަދަ ކުށަށް އިއުތިރާފްވުމުގެ އެއްބަސްވުމެއް ވެސް އޮންނާނެ ކަމަށާއި ދައުވާތައް އުފުލީ އެ އެއްބަސްވުމުގެ ދަށުން ކަމަށް ދައުލަތުން ބުންޏެވެ.
މިއަދުގެ އޮންލައިން ޝަރީއަތުގައި އަދީބު ވިދާޅުވީ އިއުތިރާފު އެއްބަސްވުމުގައި ސޮއި ކުރެއްވީ ބޭސްފަރުވާއަށް ރާއްޖެއިން ބޭރަށް ދެވޭނެ ޝަރުތަކެއް ކަމަށް އެކަން ކަނޑައެޅުމުން ކަމަށެވެ. އެ އެއްބަސްވުމުގައި ސޮއި ކުރުމަށް އެދިވަޑައިގެންނެވީ އޭރުގެ ޕީޖީ އައިޝަތު ބިޝަމާއި ފުލުހުންގެ ބައެއް އިސްވެރިން ކަމަށެވެ. އަދީބަށް ސިއްހީ ގޮތުން ގިނަ މައްސަލަތަކެއް އޭރު ކުރިމަތިވި އެވެ. ރާއްޖެއިން ބޭރުން ފަރުވާ ހޯދުމަށް ޑޮކްޓަރުން އޭރު ލަފާ ވެސް ދިނެވެ.
އަދީބު ވިދާޅުވި ގޮތުގައި ތަހުގީގަށް އެއްބާރުލުން ދޭން އޭނާ ވެސް ބޭނުންވެ އެވެ. އެކަމަކު އެ އެއްބަސްވުމާ ގުޅޭގޮތުން އިޖްރާއީ އެތައް މައްސަލައެއް އޭނާގެ ވަކީލުން ފާހަގަކުރައްވަމުން ގެންދަވަނިކޮށް، އެއްބަސްވުމުގައި ސޮއިކުރީ ބޭސްފަރުވާއަށް ކޮންމެހެން ދާން ބޭނުންވާތީ ކަމަށް ވެސް އޭނާ ވިދާޅުވި އެވެ.
Ads by STO
