އަލީވަހީދު ދިރިއުޅުއްވާ ގެ ރޭގައި ބަލައިފާސް ކުރުމަށްފަހު އިތުރު ސާރޗެއް ކުރިއަކަށް ނުގެންދޭ: ފުލުހުން
ކުރީގެ ޓޫރިޒަމް މިނިސްޓަރު އަލީ ވަހީދު ދިރިއުޅުއްވާ ގެ ބަލައި ފާސް ކުރުމަށް ރޭ ކުރިއަށް ގެންދިޔަ ސާރޗަށްފަހު އިތުރު ސާރޗެއް ކުރިއަށް ނުގެންދާ ކަމަށް ފުލުހުން ވިދާޅުވެއްޖެއެވެ.
ަަޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރިކަމުގެ ތުހުމަތުގައި މަގާމުން ވަކިކުރި އަލީ ވަހީދުގެ ގެ، ކޯޓު އަމުރެއްގެ ދަށުން ބަލައި ފާސް ކޮށްފައިވަނީ ރޭގައެވެ. އަދި އެތުހުމަތުގެ ދަށުން އެގެއިން އިލެކްޓްރޯނިކް ބައެއް ތަކެތި ފުލުހުންގެ ބެލުމުގެ ދަށަށް ގެނެސް، ހެކި ހޯދުމަށް ކުރަން ޖެހޭ މަސައްކަތް ކުރަމުންދިޔަ ކަމަށް ފުލުހުން ރޭގައި ވަނީ ބުނެފައެވެ.
އެގޮތުން އެގޭގައިހުރި ފޯނާއި ލެޕްޓޮޕް ފުލުހުންގެ ބެލުމުގެ ދަށަށް ގެންގޮސްފައިވާކަން ވަނީ އެނގިފައެވެ.
ކޯޓު އަމުރެއްގެ ދަށުން މ. ފުރަހަނި، ބަލައިފާސްކުރި ނަމަވެސް މީގެ ދުވަސްކޮޅެއް ކުރިން ފެށިގެން އަލީ ވަހީދު ދިރިއުޅުއްވަނީ އެ ގެއަކު ނޫންކަން ވެސް އެނގިފައިވެއެވެ.
