" ނެލްސަން މަންޑޭލާ ރޫލްސް" ގެ ދިވެހި ތަރުޖަމާ ނައިބު ރައީސަށް އަރުވައިފި
"ދަ ނެލްސަން މަންޑޭލާ ރޫލްސް" ފޮތުގެ ދިވެހި ތަރުޖަމާ ނައިބު ރައީސް ފައިސަލް ނަސީމްގެ އަތްޕުޅަށް މިއަދު އަރުވައިފިއެވެ. މިފޮތް ނައިބު ރައީސް ގެ އަތްޕުޅަށް އަރުވާދެއްވީ އ.ދ. އިން ދިވެހިރާއްޖެއަށް ކަނޑައަޅާފައި ހުންނަވާ ރެޒިޑެންޓް ކޯޑިނޭޓަރ މިސް ކެތަރިން ހަސްވެލް އެވެ.
މިއަދު ހެނދުނު ރައީސް އޮފީހުގައި ބޭއްވެވި މި ބައްދަލުކުރެއްވުމުގައި ވާހަކަފުޅު ދައްކަވަމުން ނައިބު ރައީސް ވަނީ މި ފޮތް ބަލައިގަތުމުގެ ފުރުސަތު ނެލްސަން މަންޑޭލާގެ އުފަން ދުވަހު ލިބިވަޑައިގަތުމަކީ އެމަނިކުފާނަށް ލިބިވަޑައިގެންނެވި ޝަރަފެއް ކަމުގައި ވިދާޅުވެ، މަންޑޭލާއަކީ ލާމަސީލު ބޭފުޅެއްކަން ފާހަގަކުރައްވާފައެވެ.
މީގެ އިތުރުން، މަންޑޭލާގެ ހަޔާތްޕުޅުން ޢިބުރަތް ލިބިގަނެ، އެމަނިކުފާނުގެ އަމިއްލަފުޅު ދިރިއުޅުމުގައިވެސް މަންޑޭލާ ގެންގުޅުއްވި ރަނގަޅު އާދަތަކާއި އުސޫލުތައް އަށަގެންނެވުމަށް މަސައްކަތްކުރައްވާ ކަމުގައި ނައިބު ރައީސް ފައިސަލް ނަސީމް ވިދާޅުވިއެވެ.
މި ބައްދަލުކުރެއްވުމުގައި އ.ދ. ގެ ރެޒިޑެންޓް ކޯޑިނޭޓަރ ދެއްކެވި ވާހަކަފުޅުގައި، ކޮންމެ ފަރުދަކުވެސް އެމީހެއްގެ ޤައުމުގެ ކަންކަން ރަނގަޅުކުރުމަށް ނެލްސަން މަންޑޭލާ ގެންގުޅުއްވި އުޞޫލުތައް ރަނގަޅަށް ދަސްކޮށް، އޭގެ ބޭނުން ހިފުން މުހިންމުކަމުގައި ވިދާޅުވިއެވެ. މިގޮތުން ޤައިދީންނާމެދު ޢަމަލުކުރާ ގޮތްތައް ދެނެގަތުމުގައި މަންޑޭލާ ގެންގުޅުއްވި ހަރުދަނާ އުޞޫލުތަކުގެ މައްޗަށް ކެތަރިން އަލިއަޅުއްވާލެއްވެވިއެވެ.
