ރައީސް ނަޝީދަށް ދިން ހަމަލާ: ތަހުގީގު ބައްލަވަން އައްބާސް ފާއިޒް ރާއްޖެ ވަޑައިގެންފި
ކުރީގެ ރައީސް އަދި ރައްޔިތުންގެ މަޖިލީހުގެ މިހާރުގެ ރައީސް މުޙައްމަދު ނަޝީދަށް އަމާޒުކޮށްގެން މެއި މަހުގެ 6 ވަނަ ދުވަހުގެ ރޭ ދިން ނިރުބަވެރި ހަމަލާގެ ތަހުގީގުތައް ކުރިއަށް ގެންދާ ގޮތް ބައްލަވަން ރައީސް އިބްރާހިމް މުހައްމަދު ޞާލިޙްގެ ފަރާތްޕުޅުން އައްޔަނު ކުރައްވާފައިވާ ހާއްސަ މަންދޫބު، އިނގިރޭސި ވިލާތުގެ އައްބާސް ފާއިޒް އިއްޔެ ރާއްޖެ ވަޑައިގެންފިއެވެ.
އައްބާސްއަކީ އެމްނެސްޓީ އިންޓަނޭޝަލްގައި ވެސް މަސައްކަތް ކުރައްވާފައިވާ އަދި ދެކުނު އޭޝިއާގެ ސަރަހައްދުގެ ގައުމުތަކުގައި އިންސާނީ ހައްގުތައް ކުރިއެރުވުމުގައި 30 އަހަރަށް ވުރެ ގިނަ ދުވަހު ހިދުމަތް ކުރައްވާފައިވާ ތަޖުރިބާކާރު ބޭފުޅެކެވެ. އެމަނިކުފާނު ރާއްޖެ ވަޑައިގެންނެވުމުން އެއާޕޯޓުން މަރުހަބާ ދެންނެވީ ރައީސް އޮފީހުގެ ޗީފް އޮފް ސްޓާފް އަލީ ޒާހިރެވެ.
ރައީސް ޞާލިޙް ވަނީ މަޖިލިސް ރައީސަށް ދިން ހަމަލައިގެ ހުރިހާ ތަހުގީގެއްގައި ވެސް ޕްރޮސެކިއުޓާ ޖެނެރަލް ހުސައިން ޝަމީމް ކަނޑައަޅުއްވާ ހުދޫދެއްގެ ތެރެއިން ބައިވެރިވެވަޑައިގެންނެވުމުގެ ފުރުސަތު އައްބާސް ފާއިޒަށް ދެއްވައިފައެވެ.
އެގޮތުން ރައީސް އޮފީހުން ވިދާޅުވީ އެ މައްސަލައިގައި އިންސާފު ގާއިމު ކުރެވެންދެން ބޭނުންވާ ހާލަތުތަކުގައި ކަމާގުޅޭ ލަފަޔާއި އިރުޝާދު ދެއްވުމުގެ އިތުރުން ތައްޔާރު ކުރައްވަން ޖެހޭ ރިޕޯޓުތައް ވެސް އައްބާސް ތައްޔާރު ކުރައްވާނެ ކަމަށެވެ.
ރައީސް ނަޝީދަށް ދިން ހަމަލާގެ ތަހުގީގު ބެއްލެވުމަށް އައްބާސް ފާއިޒް އައްޔަން ކުރެއްވީ މެއި މަހުގެ 19 ވަނަ ދުވަހުގައެވެ. މިއީ އެ މަސައްކަތަށް އައްޔަން ކުރެއްވި ފަހުން އެމަނިކުފާނު ރާއްޖެ ވަޑައިގެންނެވި ފުރަތަމަ ފަހަރެވެ.
