ބަނގްލަދޭޝްއިން ރާއްޖެއަށް ވެދެއްވާ އެހީތެރިކަމަށް ނައިބު ރައީސް ޝުކުރު އަދާކުރައްވައިފި
ބަނގްލަދޭޝް ސަރުކާރުން ދިވެހިރާއްޖެއަށް ވެދެއްވާ އެހީތެރިކަމަށް ރައީސުލްޖުމްހޫރިއްޔާގެ ނައިބު ފައިޞަލް ނަސީމް ޝުކުރު އަދާކުރައްވައިފިއެވެ.
ބަނގްލަދޭޝް ސަރުކާރުން ދިވެހިރާއްޖެއަށް ކަނޑައަޅުއްވައިފައި ހުންނަވާ ސަފީރު، ހިޒް އެކްސެލެންސީ ރިއަރ އެޑްމިރަލް މުޙައްމަދު ނަޒްމުލް ޙަސަން، މިއަދު ވަނީ ނައިބު ރައީސްގެ އަރިހަށް އިޙްތިރާމްގެ ޒިޔާރަތެއް ކުރައްވައިފައެވެ.
މިބައްދަލުކުރެއްވުން ކުރިޔަށް ގެންދަވައިފައި ވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ. މި ބައްދަލުކުރެއްވުމުގައި، މި އަހަރު ދިވެހިރާއްޖެއާއި ބަންގްލަދޭޝްއާ ދެމެދު ހާރިޖީ ގުޅުން ގާއިމުކުރެވުނުތާ 43 އަހަރު ފުރުމާ ގުޅިގެން، ދެބޭފުޅުން ވެސް ވަނީ އެކަން ފާހަގަ ކުރައްވައިފައެވެ. އަދި ދެޤައުމުގެ ގުޅުން އިތުރަށް ބަދަހި ކުރުމަށް ކުރެވެން ހުރި މަސައްކަތްތަކުގެ މައްޗަށް އަލިއަޅުއްވައިލައްވާ ދެބޭފުޅުން ވެސް ފުޅާ ދާއިރާއެއްގައި މަޝްވަރާކުރެެއްވިއެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ ދިވެހިރާއްޖޭގެ ތަރައްޤީއަށް ޓަކައި އެކިއެކި ގޮތްގޮތުން ބަންގްލަދޭޝްގެ ފަރާތުން ވެދެއްވަމުން ގެންދަވާ އެހީތެރިކަން ފާހަގަކުރައްވައި އެކަމުގެ އަގު ވަޒަންކުރައްވައި އެކަމަށް ޓަކައި ބަނގްލަދޭޝް ސަރުކާރަށް ޝުކުރު އަދާކުރައްވައިފައެވެ. އެ މަނިކުފާނުގެ ވާހަކަފުޅުގައި، އިންސާނީ ވަަސީލަތް ތަރައްޤީކުރުމަށް ޓެކްނިކަލް އަދި ވޮކޭޝަނަލްގެ އެކި ރޮނގުރޮނގުން މީހުން ތަމްރީނު ކުރުމަށް ބަނގްލަދޭޝްގެ ފަރާތުން ރާއްޖެއަށް ވެދެއްވަމުން ގެންދަވާ އެހީތެރިކަން ޚާއްސަގޮތެއްގައި ފާހަގަކުރެއްވިއެވެ. އަދި ރާއްޖޭގައި މިހާރު ވެސް ޚިދުމަތުގައި ތިބި ޑޮކްޓަރުންނާއި ސްޕެޝަލިސްޓުން މަދުކަން ފާހަގަކުރައްވައިފައި ވެއެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ކޯވިޑް 19ގެ ހާލަތުގައި ބަނގްލަދޭޝް ސަރުކާރުން ރާއްޖެއާ އެކު ބޭއްވެވި ގާތް ރަހްމަތްތެރިކަމަށް ޓަކައި، ބަނގްލަދޭޝް ސަރުކާރަށް ޝުކުރުއަދާކުރައްވައިފައި ވެއެވެ. އެގޮތުން ބަނގްލަދޭޝްއަށް ކިޔަވަން ގޮސް ތިބި ކުދިންނަށް އެ ހާލަތުގައި ދިމާވި ދަތިތައް ހައްލުކުރުމަށް ދިވެހި ސަރުކާރާ އެކު ކުރެއްވި މަސައްކަތަށް ތައުރީފުކުރެއްވިއެވެ.
މި ބައްދަލުކުރެއްވުމުގައި، ބަންގްލަދޭޝް ސަފީރު ދެއްކެވި ވާހަކަފުޅުގައި، ރާއްޖޭގައި މަސައްކަތްކުރާ ބިދޭސީން އާބާދީގެ ބޮޑު ބައެއް ހިއްސާކުރަނީ ބަނގްލަދޭޝްގެ ރައްޔިތުންކަން ފާހަގަކުރައްވައިފައިވެއެވެ. އެގޮތުން ރާއްޖޭގައި މަސައްކަތްކުރާ އެ ފަރާތްތަކަށް ކުރިމަތިވެފައިވާ އަދި ކުރިމަތިވަމުންދާ އެކިއެކި މައްސަލަތަކުގެ މައްޗަށް ފުޅާ ދާއިރާއެއްގައި ވާހަކަފުޅުދައްކަވައޮފައިވެއެވެ.
މި ދެ ބޭފުޅުންގެ ވާހަކަފުޅުގައި، ދެ ޤައުމުގެ ދެމެދުގައި އޮތް ގާތް ރަޙުމަތްތެރި ގުޅުން އިތުރު ހަރުފަތަކަށް ގެންދިއުމަށް ޝައުޤުވެރިކަން ފާޅުކުރައްވައި، ދޭދޭ ގުޅުންތައް އިތުރަށް ހަރުދަނާ ކުރެވިދާނެ ގޮތްތަކުގެ މައްޗަށް އަލިއަޅުއްވައިލެއްވިއެވެ.
