އިންޑިއާ ކަނޑުގެ އެންމެ މަގުބޫލު މަންޒިލަކަށް ރާއްޖެ!
އިންޑިޔާ ކަނޑުގެ، ފަތުރުވެރިކަމުގެ އެންމެ މަގުބޫލު މަންޒިލަކަށް 13ވަނަ ފަހަރަށް ރާއްޖެ ހޮވިއްޖެއެވެ.
ވޯލްޑް ޓްރެވަލް އެވޯޑްސްގެ އިންޑިޔާގެ ކަނޑުގެ އެންމެ މަގުބޫލު ފަތުރުވެރިންގެ މަންޒިލުގެ އެވޯޑް ރާއްޖެއިން ހޯދައިފައިވާއިރު އިންޑިއަން އޯޝަންގެ ލީޑިން ބީޗު ޑެސްޓިނޭޝަންގެ އިތުރުން ލީޑިން ޑައިވް ޑެސްޓިނޭޝަންގެ އެވޯޑު ވެސް ރާއްޖެއިން މިއަހަރު ވަނީ ހޯދައިފައެވެ. އިންޑިއާ ކަނޑުގެ ލީޑިން ޓޫރިސްޓު ބޯޑުގެ އެވޯޑް ލިބިފައި ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އަށެވެ.
ރާއްޖެއަކީ ފަތުރުވެރިންގެ މެދުމުގައި މަގްބޫލު މަންޒިލެކެވެ. ކޮވިޑް-19ގެ ހާލަތުގައި ރާއްޖޭގެ ފަތުރުވެރިކަން ވަރަށް ބޮޑަށް ދަށަށް ދިޔުމަށް ފަހު މިހާރު ރާއްޖޭގެ ފަތުރުވެރިކަން ދަނީ މަޑުމަޑު ހަމަޔަކަށް އެޅެމުންނެވެ. އަދި ރާއްޖެ އަންނަ ފަތުރުވެރިންގެ އަދަދު ދަނީ މަތިވަމުންނެެވެ.
ރާއްޖޭގެ އިގްތިސާދުގެ މައިގަނޑު ކަމުގައިވާ ފަތުރުވެރިކަން ރަނގަޅުކުރުމަށް ޓަކައި ސަރުކާރުން ދަނީ ބޮޑެތި މަސައްކަތްތައް ކުރަމުންނެވެ. މިގޮތުން ބައިނަލް އަގުވާމީ މާކެޓަށް ރާއްޖެ އިޝްތިހާރު ކުރުމަށް ޓަކައި ޓޫރިޒަމް މިނިސްޓްރީން ދަނީ ބައިނަލްއަގުވާމީ ތަފާތު ކެމްޕެއިންތައް ހިނގަމުންނެވެ.
