މިއުޒިކު ވީޑިއޯއެއް ޝޫޓުކުރުމުގެ ތެރޭގައި ރެޕަރެއްގެ ގައިގައި ހަރުފައެއް ދައިގެންފި
ރެޕާ މައީޓާ މިއުޒިކް ވީޑިއޯއެއް ޝޫޓު ކުރަމުން ދަނިކޮށް ހަރުފައެއް ދައިގެންފިއެވެ.
އޭނާގެ ސޯޝަލް މީޑިއާގައި ހިއްސާކޮށްފައިވާ ވީޑިއޯއެއްގައި ފެންނަނީ މައީޓާ ބިންމަތީގައި އޮށޯވެއޮވެ ދެ ހަރުފައާ އެކު ޕޯޒްކުރާތަނެވެ. ދެން ފެންނަނީ ފަހަތުން އައިސް ހަރުފަ އޭނާގެ ދަތްދޮޅިއަށް ހަމަލާދިން ތަނެވެ.
ރެޕަރު ވަރަށް ހައިރާންވެ ނުތަނަވަސްވެފައިވާ މަންޒަރު ވެސް މި ވީޑިއޯއިން ފެނެއެވެ. ނަސީބަކުން ރެޕް ލަވަކިޔުންތެރިޔާއަށް އެއްވެސް ގެއްލުމެއް ލިބިފައެއް ނުވެއެވެ. މި ކުޑަ ކްލިޕްގެ ކެޕްޝަންގައި "ވަޓް އައި ގޯ ޓު މޭކް އަ ވީޑިއޯފޯ ޔޫ އޯލް" ލިޔެފައި ވެއެވެ. އަދި މި ވީޑިއޯ މިދިޔަ ހަފްތާގައި ޕޯސްޓްކުރި ފަހުން މިހާތަނަށް 512 ހާސް ފަހަރު ބަލައިފައިވެއެވެ.
ފޮޓޯޝޫޓްތަކާއި އެހެނިހެން ކްރިއޭޓިވް ހަރަކާތްތަކުގައި ބޭނުންކުރާ ހަރުފަތަކަކީ އެއްވެސް ވިހަކަމެއް ނުވާ އަދި ގެއްލުމެއްނުދޭ ހަރުފަތަކެކެވެ. ނަމަވެސް މިކަހަލަ ހަރުފައެއް ވެސް މީހަކަށް ބާރަށް ހަމަލާދީފި ނަމަ، ހާއްސަކޮށް ލޯ ފަދަ ސެންސިޓިވް އޭރިއާތަކަށް ހަމަލާދީފި ނަމަ ގެއްލުން ވާނެއެވެ. ތަޖުރިބާކާރުން ގެ ނަޒަރުގައި މީހެއްގެ މޫނު ކައިރީގައި މިފަދަ ހަރުފައެއް ހިފެހެއްޓުމަކީ ވެސް ރަނގަޅު ވިސްނުމެއް ނޫނެވެ.
ޖަނަވާރުންގެ ހައްގުތަކާ ބެހޭ މާހިރުން ގަބޫލުކުރާ ގޮތުގައި މުނިފޫހިފިލުވުމުގެ ދާއިރާގައި ވަލު ޖަނަވާރު، ބޭރު ދޫނި، ނުވަތަ ހަރުފަ ބޭނުން ކޮށްގެން ނުވާނެއެވެ. އޭގެ ބަދަލުގައި އާޓިސްޓުންނަށް ކޮމްޕިއުޓަރުން ޖެނެރޭޓެޑް ފޮޓޯތައް ބޭނުންކޮށްގެން އެމީހުންގެ ކްރިއޭޓިވް ވިޝަން ފުރިހަމަ ކުރެވިދާނެއެވެ.
ދާދި ފަހުން އެކްޓަރު ސަލްމާން ޚާން އޭނާގެ އުފަންދުވަހާ ދިމާކޮށް ޕަންވެލް ފާމްހައުސްގައި ވަނިކޮށް ހަރުފައެއް ވަނީ އޭނާގެ ގައިގައި ވެސް ދަތް އަޅައިފައެވެ. އަދި އޭނާ ހޮސްޕިޓަލުން ދޫކޮށްލީ އެންޓި-ވެނޮމްގެ ޑޯޒެއް ދިނުމަށް ފަހުއެވެ. ފާހަގަކޮށްލަން ޖެހޭ ކަމަކީ އިންޑިއާއަކީ އެންމެ ގިނަ އަދަދަކަށް މިފަދަ ހާދިސާތައް ހިނގާ އަދި މުޅި ދުނިޔެއިން ވެސް ހަރުފަދޭ ހަމަލާތަކުގައި މަރުވާ މީހުންގެ ގާތްގަނޑަކަށް 50 އިންސައްތަ ހިއްސާކުރާ ގައުމެވެ.
