ހުޅުމާލެ ދެވަނަ ފިޔަވަހީގައި ޕޮލިސް ސްޓޭޝަނެއް ގާއިމް ކުރަނީ
ހުޅުމާލެ ދެވަނަ ފިޔަވަހީގައި ޕޮލިސް ސްޓޭޝަނެއް ގާއިމްކުރުމުގެ މަސަތްކަތް ހަލުވިކަމާ އެކު ކުރިއަށްދާކަމަށް ފުލުހުން ބުނެފިއެވެ.
މި އަހަރުގެ އޮކްޓޯބަރު މަަހުގެތެރޭގައި އަލަށް އާބާދުވި ހުޅުމާލޭގެ ދެވަނަ ފޭސް ބެލެހެއްޓުމަށް ހުޅުމާލޭގައި މަސައްކަތްކުރާ ފުލުހުން ހަރަކާތްތެރިވަމުންދާއިރު، ދެވަނަ ފިޔަވަހީގައި ދިރިއުޅޭ ރައްޔިތުންނަށް ފުލުހުންގެ ހިދުމަތް ގާތުން ފޯރުކޮށްދިނުމަށް ޓަކައި ޕޮލިސް ސްޓޭޝަނެއް އިމާރާތް ކުރުމުގެ މަސައްކަތް ބާރުސްޕީޑުގައި ކުރަމުން އަންނަ ކަމަށް ފުލުހުން ބުނެފައިވެއެވެ.
ފުލުހުން ބުނީ އަންނަ އަަހަރުގެ ކުރީކޮޅު ޕޮލިސް ސްޓޭޝަންގެ މަސައްކަތްތައް ނިމި ހިދުމަތްދޭން ފެށޭވަރުވާނެ ކަމަށް ބެލެވޭ ކަމަށެވެ. އަދި ސްޓޭޝަނާ އެކު ފުލުހުންދޭ ހުރިހާ ހިދުމަތެއް އެ ސަރަހައްދުގައި ދިރިއުޅޭ ރައްޔިތުންނާ ގާތުން ފަހިވެގެންދާނެކަމަށް ވެސް ފުލުހުން ބުނެފައިވެއެވެ.
ފުލުހުން ބުނީ ފޭސް ދެއަކީ ގިނަ ބަޔަކު ޒިޔާރަތްކޮށް އަދި ގިނަ މަސައްކަތްތަކެއް ވެސް ކުރަމުންދާ ސަރަހައްދަކަށް ވުމާއެކު ރައްޔިތުންގެ ސަލާމަތާއި ރައްކާތެރިކަމަށް ހާއްސަ ސަމާލުކަމެއްދީގެން ފުލުހުން އެތަނުގައި މަސައްކަތްތަކެއް މިހާރުވެސް ކުރަމުން އަންނަ ކަމަށެވެ. އެގޮތުން، ޕެޓްރޯލްކުރުމާއި ކުށުން ރައްކާތެރިކުރުމަށް ރައްޔިތުންނަށް މައުލޫމާތުދީ ހޭލުންތެރިކުރުވުމުގެ ހަރަކާތްތައް ރާވައި ހިންގަމުން އަންނަ ކަމަށް ފުލުހުން ބުނެފައިވެއެވެ.
މީގެ އިތުރަށް ފުލުހުން ބުނީ ހުޅުމާލެ ފޭސް ދެއަކުން ގިނައިން ހުށަހެޅެނީ ވައްކަމުގެ މައްސަލަތަކާއި އެކްސިޑެންޓުގެ މައްސަލަތައް ކަމަށެވެ. އަދި ވައްކަމުގެ މައްސަލަތަކުން ގިނައިން ހުށަހެޅިފައި ވަނީ މަސައްކަތްކުރަމުންދާ ސައިޓުތަކުން ވައްކަންކޮށްގެން ހުށަހެޅިފައިވާ މައްސަލަތައް ފުލުހުން ބުނެއެވެ.
ކުށް މަދު އަމާން ވެއްޓެއް ގާއިމުކުރެވިގެން ދާނީ ފުލުހުންނާއި ރައްޔިތުން ގުޅިގެން ކުރެވޭ މަސައްކަތުންކަމަށް ވެފައި، ހުޅުމާލޭ ފޭސް ދޭއް ވެސް ރައްކާތެރިއަމާން މާހައުލަކަށް ފުލުހުން ކުރަމުންދާ މަސައްކަތްތަކުގައި އާންމު ރައްޔިތުންގެ އެއްބާރުލުމާއި އެހީތެރިކަން ލިބިގެން ދިއުމަކީ މަސައްކަތްތަކަށް ލިބިގެންދާ އިތުރު ކުރިއެރުމެއް ކަމަށް ފުލުހުން ބުންޏެވެ. އަދި އެއީ ފުލުހުންނަށް ލިބޭ އިތުރު ބާރެއް ކަމަށް ވެސް ބުނެފައިވެއެވެ.
