މަރޮށި ބަނދަރު އަޕްގްރޭޑްކުރުމުގެ މަޝްރޫއު އިފްތިތާހުކޮށްފި
އަންނަ މަހުގެ 5ގައި ބާއްވަން ހަމަޖެހިފައިވާ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި-އިލެކްޝަނާ ދިމާކޮށް އެ ދާއިރާގައި ހިމެނޭ ށ. މަރޮށީގެ ބަނދަރު އަޕްގްރޭޑްކުރުމުގެ މަޝްރޫއު އިއްޔެ އިފްތިތާހްކޮށްފިއެވެ.
މަރޮށީގެ ބަނދަރު އަޕްގްރޭޑްކުރުމުގެ މަޝްރޫއު އިފްތިތާހުކުރި ނަމަވެސް، މި މަޝްރޫއު ވަނީ މިދިޔަ އަހަރު ސެޕްޓެމްބަރު 15ގައި ހެވީ ފޯސް ޕްރައިވެޓް ލިމިޓެޑާ ހަވާލުކޮށްފައެވެ. އެ ކުންފުންޏާ މި މަސައްކަތް ހަވާލުކޮށްފައި ވަނީ 420 ދުވަސް ތެރޭ ނިންމާ ގޮތަށެވެ.
މި މަޝްރޫއު އިފްތިތާހުކޮށްދެއްވީ ނައިބު ރައީސް ފައިސަލް ނަސީމެވެ. ފައިސަލް މިހާރު ގެންދަވަނީ ކޮމަންޑޫ ދާއިރާއަށް ވާދަކުރާ އެމްޑީޕީގެ ކެންޑިޑޭޓް މުހައްމަދު ރާޝިދަށް ތާއީދު ހޯދުމަށް އެ ދާއިރާގެ ރަށްތަކަށް ދަތުރުކުރައްވަމުންނެވެ.
މި މަޝްރޫއަކީ 43.3 މިލިއަން ރުފިޔާގެ މަޝްރޫއެކެވެ. މި މަޝްރޫއުގެ ދަށުން މަރޮށި ބަނދަރާއި ނެރު ފުންކޮށް، 202 މީޓަރުގެ ސަރަހައްދެެއްގައި ގްރޮއިން ޖަހައި، ބޮޑުހިލަ ޖަހައިގެން 131 މީޓަރުގެ ބޭރުގައި ތޮށިލާނެއެވެ. އަދި 416 މީޓަރުގެ އެއްގަމުގައި ތޮށިލައި 2ނެވިގޭޝަން ލައިޓާއި 20 މަގުބައްތި ހަރުކުރުން ވެސް ހިމެނެއެވެ.
ރައީސް އިބްރާހިމް މުހައްމަދު ސޯލިހް ވަނީ މިމަހުގެ ކުރީކޮޅު ކޮމަންޑުއާއި މަތިކޮމަންޑޫ ގުޅައިލުމުގެ މަޝްރޫއު އިއުލާން ކުރައްވައިފައެވެ. ގާތްގަނޑަކަށް 250 މިލިއަން ރުފިޔާގެ އެ މަޝްރޫއު މިދިޔަ ބުދަ ދުވަހު އެމްޓީސީސީއާ ހަވާލުކޮށްފައިވާއިރު މިދިޔަ ހުކުރު ދުވަހު ވަނީ އެ މަޝްރޫއުގެ އަމަލީ މަސައްކަތް ފަށައިފައެވެ.
އިންތިހާބަށް ކުޑަ ދުވަސްކޮޅެއް ވެފައި ވަނިކޮށް ކޮމަންޑޫ ދާއިރާގައި މަޝްރޫއުތައް ހިންގާތީ ޓްރާންސްޕޭރެންސީ މޯލްޑިވްސްއިން ވަނީ އެކަމާ ކަންބޮޑުވުން ފާޅުކޮށް ބަޔާނެއް ވެސް ނެރެފައެވެ. އެކަން އެ ޖަމްއިއްޔާއިން ސިފަކޮށްފައި ވަނީ ސަރުކާރުގެ މުދާ ނަހަމަ ގޮތުގައި ބޭނުން ކުރުމުގެ ގޮތުގައެވެ.
