އިތުރު 3،059 މީހުން ބޫސްޓަރ ޑޯޒް ޖަހައިފި
ކޮވިޑް-19އިން ދިފާއުވުމަށް ޓަކައި ޖަހާ ބޫސްޓަރ ވެކްސިން ޑޯޒް، ހޯމަ ދުވަހު 3،000އަށް ވުރެ ގިނަ މީހުން ޖަހައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ހޯމަ ދުވަހު 3،059 މީހުން ބޫސްޓަރ ޑޯޒް ޖަހައިފައިވާ ކަމަށެވެ. މީގެތެރޭގައި ހިމެނެނީ މާލެ ސަރަހައްދުން ބޫސްޓަރ ޑޯޒް ޖެހި 675 މީހުންނާއި، އަތޮޅު ތެރެއިން ވެކްސިން ޖެހި 2،384 މީހުންނެވެ. މިއާ އެކު ބޫސްޓަރ ޑޯޒް ޖެހި މީހުންގެ އަދަދު ވަނީ 75،884އަށް އިތުރު ވެފައެވެ.
މީގެ އިތުރުން 27 މީހަކު ވަނީ ކޮވިޑް ވެކްސިންގެ ފުރަތަމަ ޑޯޒް ޖަހައިފައެވެ. އެއީ އަތޮޅު ތެރެއިން ވެކްސިން ޖެހި 13 މީހުންނާއި، މާލެ ސަރަހައްދުން ވެކްސިން ޖެހި 14 މީހުންނެވެ. މިއާއެކު ފުރަތަމަ ޑޯޒް ޖެހި މީހުންގެ އަދަދު ވަނީ 397،642އަށް އަރައިފައެވެ.
ހޯމަ ދުވަހު އިތުރު 63 މީހަކު ވެކްސިންގެ ދެވަނަ ޑޯޒް ޖަހައިފައިވެއެވެ. މިއާ އެކު ދެވަނަ ޑޯޒް ޖެހި މީހުންގެ އަދަދު ވަނީ 369،883 އަށް އިތުރު ވެފައެވެ.
އެޗްޕީއޭއިން އިއްޔެ ބުނީ، ވެކްސިންގެ ދެ ޑޯޒް ފުރިހަމަކޮށް، ހަމަސް ދުވަސް ފާއިތުވެފައިވާ ނަމަ، ވެކްސިން ފުރިހަމަ ކުރިކަމަށް ބެލެވޭނީ ބޫސްޓަރ ޑޯޒް ޖެހުމުން ކަމަށެވެ.
