ހީކުރީ އާދައިގެ ރޯގާއެއްކަމަށް ، ނަމަވެސް ގެއްލުނީ 20އަހަރު ދުވަހުގެ ހަނދާންތައް!
އިނގެރޭސި ރައްޔިތެއް ކަމަށްވާ ކްލެއާ ރީސް 2021ވަނަ އަހަރުގެ ރެއެއްގައި ތަންކޮޅެއް އަވަހަށް ނިދަން އޮށޯވެލީ ރޯގާޖެހި ކުޑަކޮށް ބަލިވެއުޅޭތީއެވެ. އާދައިގެ ރޯގާއެއް ކަމަށް ހީކޮށް ނިދައިލި ކްލެއާއަށް ޖެހިގެން އަދި ދުވަސް ވެގެން ދިޔައީ އޭނާގެ މުޅި ދިރިއުޅުން ބަދަލުކޮށްލި ދުވަހަކަށެވެ. ރޭގަނޑު ނިދަން ޖައްސައިލި ކްލެއާގެ ބަލި ބޮޑުވެ ޖެހިގެން އައި ހެނދުނު އޭނާ ހޮސްޕިޓަލްގެ ކޯމާއަކަށް ލިއެވެ. އަދި ކޯމާގައި 16 ދުވަހު އޮތުމަށް ފަހު ހޭވެރިކަން ވީއިރު އޭނާގެ ހަޔާތުގެ 20 އަހަރުގެ ހަނދާންތައް އޭނާއާ ވަކިވެގެން ގޮސްފިއެވެ.
މި މަހުގެ 22ވަނަ ދުވަހު ފާހަގަކުރި އެންސަފިލިޓިސް ދުވަހުގައި ދެކުދިންގެ މަންމަ ކްލެއާއާއި ފިރިމީހާ ސްކޮޓް ވަނީ އެ މީހުންގެ ދިރިއުޅުމަށް އައި ބޮޑު ބަދަލު އާންމުންނާ ހިއްސާކޮށްފައެވެ. (އެންސަފިލިޓިސްއަކީ އިންފެކްޝަނެއްގެ ސަބަބުން ސިކުނޑީގެ ޓިޝޫތަކަށް ގެއްލުން ލިބުމުގެ ބައްޔަކަށް ކިޔާ ނަމެކެވެ.)
"އޭރު ކްލެއާއަށް ރޯގާ ޖެހިގެން އުޅޭތަ ދެހަފްތާއެއްހައި ދުވަސްވެއްޖެ ، މަޑުމަޑުން ގޯސްވަމުން އައީ ، އެއްރެއަކު ހަމަ އާދައިގެ މަތީން ނިދީ ، ޖެހިގެން އައި ދުވަހު ހެނދުނު ބަލި މުޅިން ގޯސްވީ" އެ ހަނދާންތައް އައު ކުރަމުން ފިރިމީހާ ސްކޮޓް ކިޔައިދީފައި ވެއެވެ.
ވަގުތުން އޭނާ ، އަނބިމީހާ ހޮސްޕިޓަލަށް ގެންދިޔައެވެ. އަދި މީހާގެ ސިކުނޑި ހަމަނުޖެހި ، ތެޅިފޮޅެން ފެށުމުން އޭނާ ވެންޓިލޭޓަރަށް ލިއެވެ. ސްކޮޓް ކިޔައިދީފައިވާ ގޮތުގައި ޑޮކްޓަރުން ވެސް ފުރަތަމަ ހީކުރީ އެއީ ސިކުނޑިން ލޭފޭބުމުގެ ސަބަބުން ދިމާވި ކަމެއް ކަމަށާއި ނަމަވެސް ޓެސްޓްތައް ހެދުމުން އެ ބައްޔަކީ އެންސަފިލިޓިސްކަން ދެނެގަނެވުނު ކަމަށެވެ.
ފްރީލާންސް ޖާނަލިސްޓެއްގެ ގޮތުގައި މަސައްކަތް ކުރި ކްލެއާ ބުނެފައި ވަނީ މި ބަލީގެ ސަބަބުން ހަޔާތުގެ ވަރަށް މުހިންމު ކަންތައްތަކެއް އޭނާގެ ހަނދާނުން ފޮހެވިގެން ގޮސްފައިވާ ކަމަށެވެ.
"އަހަންނަށް އެނގޭ އަހަރެންގެ ދަރީން ތިބިކަން ، އަހަންނަށް އެކުދީން ވަކިކުރަން ވެސް އެނގޭ، އެހެން ނަމަވެސް އެ ކުދީންގެ އުފަން ދުވަސްތަކާއި އެކުދީން ސްކޫލަށް ދިޔަ ފުރަތަމަ ދުވަހާއި އެކުދީން ގަޔާވާ ތަކެއްޗާއި ކަންކަން ވަނީ އަހަރެންގެ ހަނދާނުން ފިލައިގެން ގޮސްފައި" ކްލެއާ ކިޔައިދީފައި ވެއެވެ.
ކްލެއާ ބުނެފައި ވަނީ އޭނާ ދަންނަ ދަންނަ ހުރިހައި އެންމެން ވެސް ވަކިކުރަން އެނގޭ ކަމަށާއި އެކަމަށް ޓަކައި ޝުކުރުވެރިވާ ކަމަށެވެ.
ކްލެއާ: ފިރިމީހާއާއި ދަރީންނާ އެކު ، ހަޔާތުގެ މުހިންމު ހަނދާންތައް ވަނީ ވަކިވެފައި
"އަހަރެންގެ ހަނދާނުން ފިލައި ، ސްކޮޓް އެއީ އަހަންނަށް ބީރައްޓެއްސެއް ކަމަށްވީ ނަމަ އަހަންނަކަށް ނޭނގެ އޭނާގެ ދުވަސްތައް ހޭދަވާނީ ކިހިނެއް ކަމެއް ވެސް" ކްލެއާ ބުނެފައި ވެއެވެ.
ކްލެއާ ބުނީ އޭނާގެ ގެއްލިފައިވާ ހަނދާންތައް އަނބުރާ އައުމުގެ ފުރުސަތު އެބައޮތް ކަމަށާއި އެކަން އެހެން ނުވެއްޖެ ނަމަ "ދެން ޖެހޭނީ އުފާވެރި އައު ހަނދާންތަކެއް އުފައްދަން" ކަމަށެވެ.
