މުޒާހަރާގައި ހަރަކާތްތެރިވި ގޮތް ނޭނގޭ މީހަކީ ކާކުކަން ފުލުހުން ބުނެދީފި
އިއްޔެ އިދިކޮޅު ފަރާތްތަކުން ބޭއްވި އެއްވުމުގައި، ރީނދޫ ކުލައިގެ ގަމީހެއްގައި ހަރަކާތްތެރިވީ ފުލުހުންގެ ވަޒީފާގައި ސިއްހީ ހިދުމަތްދޭ ބަހާގައި މަސައްކަތް ކުރާ މީހެއް ކަމަށް ފުލުހުން ބުނެފިއެވެ.
ރީނދޫ ގަމީހެއް ލައިގެން ހުރި މީހަކު، އިއްޔެ މުޒާހަރާކުރި ސަރަހައްދުގައި ހަރަކާތްތެރިވަމުން ދިޔަ މަންޒަރު ފެންނަ ފޮޓޯއާއި ވީޑިއޯ، މީސްމީޑިއާގައި ވަނީ އާންމުވެފައެވެ. އެމީހާއަކީ އިންޑިއާގެ ސިއްރު އެޖެންޓެއް ކަމަށް އިދިކޮޅުން ތުހުމަތު ކުރިއެވެ. މިކަމާ ގުޅޭ ގޮތުން އިއްޔެ ނޫސްވެރިން ސުވާލު ކުރުމުންވެ ސް، ފުލުހުން ޖަވާބެއް ދީފައެއް ނުވެއެވެ.
ފުލުހުންގެ މީޑިއާ އޮފިޝަލު މިއަދު ވިދާޅުވީ އެމީހަކީ ފުލުހުންނާ އެކު މެޑިކަލް ޓީމްގައި މަސައްކަތް ކުރި މީހެއް ކަމަށެވެ.
ބައެއް ނޫސްތަކުން މި މުވައްޒަފުގެ ފޮޓޯއާއި މައުލޫމާތު ހާމަކުރި ގޮތުން، އޭނާއަށް އިންޒާރު ލިބެމުންދާ ކަމަށް ވެސް ފުލުހުން ވަނީ ބުނެފައެވެ.
އިދިކޮޅު ފަރާތްތަކުން ކާނިވާ ސަރަހައްދުގައި ބޭއްވި އެއްވުމަށް އިއްޔެ ފުލުހުން ހުރަސް އެޅުމުން، އިދިކޮޅުން ވަނީ ކަންބޮޑުވުން ފާޅުކޮށްފައެވެ. އެއްވުމުގެ ތެރެއިން 17 މީހަކު ހައްޔަރުކުރިިއިރު، އެ އެންމެން ވެސް އަދިވެސް ތިބީ ހައްޔަރުގައެވެ.
