ލޯބިވެރިޔާ ބޭވަފާތެރި ވާއިރަށް ބްލީޗް ބޯން އުޅެނީ ކޮންބައެއް؟
ލޯތްބަކީ ވަރަށް ބާރުގަދަ އިހްސާސެކެވެ. އެންމެ ހިތްވަރުގަދަ މީހާވެސް ލޯބީގައި ހިތްވަރުއެލި ދުވަހަކުވެސް ނުކުރާ ކަންކަން ކުރެއެވެ.
އިންސާނުގެ ތެރޭގައި އެކި ވައްތަރުގެ ލޯބިވެއެވެ. އޭގެ ތެރެއިން އެންމެ މާތް ލޯތްބަކީ ދަރިން މައިންބަފައިން ދެކެ ވާ ލޯތްބެވެ. އެއާއި ހިލާފަށް އެންމެ ނުރައްކާތެރި އެއް ލޯތްބަކީ އިޝްގީ ލޯތްބެވެ. އެ ލޯބީގެ ބާރުން ތިމާ އެއްދުވަހު ކަރުނަ އަޅާފިއްޔާ އަނެއް ދުވަހު އުފާކުރާނެއެވެ.
ޝައްކެއްވެސް ނެތެވެ. މީހަކު ދެކެ ހެޔޮ ހިތުން ލޯބި ވެވިއްޖެނަމަ އޭނާއާއި ދުރުގައި އުޅުމަކީ ހަގީގަތުގައި ފަސޭހަ ކަމެއް ނޫނެވެ. އަދި ލޯބީގައި ދިމާވާ ނާކާމިޔާބާއި ކެރިގެން ކުރިމަތިލާން ކެރޭނީ ވަރަށް ހިތްވަރު ގަދަ މަދު ބަޔަކަށެވެ.
ލޯބިވެރިޔާއަށްޓަކައި، އަމިއްލަ ފުރާނަ ގުރުބާން ކޮށްލުމަށްވެސް ބައެއް މީހުން ތިބެނީ ތައްޔާރަށެވެ. ލޯބީގެ ހައްގުގައި ފުރާނަ ދޫކޮށްލި އެތައް ބައެއް އަހަރެމެންގެ މާޒީއާއި ވެސް ވަނީ އެކުވެގެން ގޮސްފައެވެ. ލޯބިވެރިޔާގެ ފަރާތުން ލިބޭ އަނިޔާތަކާއި ބޭވަފާތެރިކަމަކީ ގިނަ މީހުންނަށް ތަހައްމަލު ކުރަން ކުޅަދާނަ ވޭނެއް ނޫނެވެ. މީގެ އާހިރު ނަތީޖާއަކަށް ވަނީ އަމިއްލަ ނަފްސަށް ގެއްލުން ދިނުން ނޫނީ އަމިއްލަ މަރުވާން މަސައްކަތް ކުރުމެވެ. ލޯބިވެރިޔާ ބޭވަފާތެރިވުމުން ބްލީޗް ބޯން އުޅުނީ ތިޔައިން ތެރެއިން ކިތަށް މީހުން ހެއްޔެވެ؟ ޔަގީނުންވެސް މިއީ މިހާރު މަދުން ނަމަވެސް ބައެއް ދިވެހި ޒުވާނުންގެ ތެރެއިން ފެންނަމުންދާ މަންޒަރެކެވެ.
ލޯބީގެ ގޮތުން ގުޅިގެން އުޅޭ ބައިވެރިޔާ ގުޅުން ކަނޑާލާނެ ކަމަށް ބުނެފިނަމަވެސް ، އެންމެ ފުރަތަމަ ބުނާނީ އޭނާ އާއި ނުލާ ދުނިޔޭގައި ނޫޅެވޭނެ ވާހަކައެވެ. ދޫކޮށްލާފައި ގޮސްފިނަމަ އަމިއްލައަށް މަރުވާނެ ކަމުގެ އިންޒާރު ދީގެންވެސް ބޭނުންވާނީ ލޯބިވާ ކުއްޖާ ހާސިލުކުރާށެވެ.
ހަގީގަތުގައި، ކަމެއް ވާއިރަށް އަމިއްލަ ނަފްސަށް އަނިޔާދީ ނުވަތަ އަމިއްލަ މަރުވާން އުޅުމަކީ އަދި ހައްލެއް ނޫނެވެ. ހިނދުކޮޅަކަށްވެސް އަޅުގަނޑުމެން މިދުނިޔެއަށް ފޮނުވި މަގްސަދު ހަނދާން ނައްތާލައިގެން ނުވާނެއެވެ. ހިތާމައަކީ ލޯބިވެރިޔާ އާއި މައްސަލަ ޖެހިގެން އަމިއްލަ ނަފްސަށް ގެއްލުންދީ ހެދުން މަޑު މަޑުން ދިވެހިންގެ ތެރޭގައިވެސް އާއްމު ވަމުން ދާތީއެވެ.
ވިސްނާލާށެވެ. ތިބާގެ މަންމަ ނުވަ މަހާއި ނުވަ ދުވަހު ބަނޑުގައި ރައްކާތެރިކަމާއި އެކު ބެލެހެއްޓީ ލޯބިވެރިޔާއަށް ޓަކައި އަމިއްލައަށް މަރުވާ މަންޒަރު ބަލަން ހެއްޔެވެ؟ ލޯބިވެރިޔާ ދެކެ ވާ ލޯބި އެ މަންމަ ތިބާ ދެކެ ވާ ލޯތްބަށް ވުރެ ބޮޑެއް ނުވާނެއެވެ. އަޅުގަނޑު މެންނަކީ ސައްތައިން ސައްތަ މުސްލިމު ގައުމެއްގައި އުޅޭ މުސްލިމުންނެވެ. އިސްލާމް ދީނުގައި އަމިއްލަ އަށް މަރުވުމަކީ ހަރާމްކަމެކެވެ. ލޯބިވެރިޔާ އާއި މައްސަލަ ޖެހިގެން އަމިއްލަ ހަށިގަނޑަށް ގެއްލުން ދޭ ހިތަށް އަރައި ކޮންމެ ފަހަރަކު ނަމާދު ކުރާށެވެ. ގުރުއާން ކިޔެވުން އިތުރުކޮށް މީހާގެ އަގީދާ ވަރުގަދަ ކުރާށެވެ. ޔަގީނެވެ. އޭރުން ހިތަށް ހިތްހަމަ ޖެހުން ލިބޭނެއެވެ.
