"34 އަހަރު ވިޔަސް، އިއްޔެހެން ހަނދާން އެބަހުރި"
ބަޑި ބުރާސްފަތި، ނުވަތަ ނޮވެމްބަރު ތިނެއްގެ ޢުދުވާނީ ހަމަލާ، އިއްޔެ ވީ ކަމެއް ފަދައިން ހަނދާނުގައި އެބަހުރި ކަމަށް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނައިބު ރައީސް މުޙައްމަދު ޣައްސާން މައުމޫން ވިދާޅުވެއްޖެއެވެ.
ޣައްސާން މިއަދު ކުރެއްވި ޓްވީޓެއްގައި ވަނީ، 1988 ވަނަ އަހަރުގެ ނޮވެމްބަރުމަހުގެ ތިން ވަަނަ ދުވަހު ސްރީލަންކާގެ ތަމަޅައިންނާ ހަނގުރާމަކޮށް، ރާއްޖެ ސަލާމަތް ކުރި ސިފައިންނަށް އައްސަރިބަހާ ސާބަސް ދަންނަވާފައެވެ.
އަދި ޝަހީދުންގެ ފުރާނަތަކަށް ހެޔޮ ރަޙްމަތްލެއްވުން އެދި، އޭނާ ދުޢާވެސް ކުރެއްވިއެވެ.
ނޮވެމްބަރު ތިނެއްގައިރާއްޖެއަށް ކުރިމަތިވި ޢުދުވާނީ ޙަމަލާއަކީ ދިވެހިންގެ ބަޔަކާއި ސްރީލަންކާގެ ޓެރަރިސްޓް ޖަމާޢަތެއް ކަމަށްވާ ޕީޕަލްސް ރިބަރޭޝަން އޮފް ޓެމިލް އީލާމް (ޕްލޯޓް)ގެ ހަތިޔާރުއެޅި ބަޔަކު މާލެ ގެނެސްގެން ރާއްޖޭގައި އޮތް ޤާނޫނީ ސަރުކާރު ވައްޓާލުމަށް ޓަކައި ހިންގި ޢުދުވާނީ ހަމަލާއެކެވެ.
މި ޙަމަލާ ރާވައި ހިންގުމުގައި ދިވެހިންގެ ތެރެއިން އިސްކޮށް ތިބީ ހ. ހާޖަރާގޭ ޢަބްދުﷲ ލުޠުފީއާއި ސ. ހިތަދޫ ޕެރިސްހޮލިޑޭ ސަގަރު އަޙްމަދު ނާޞިރެވެ.
އެ ހަމަލާގައި 19 ދިވެއްސަކު ޝަހީދުވިއެވެ. އޭގެތެރޭގައި ހިމެނެނީ ސިފައިންގެ 8 ބޭކަލުންނާއި އާންމުންގެ 11 މީހުންނެވެ.
