އިމްރާން ޚާންގެ ދިފާއުގައި ބޮޑެތި މުޒާހަރާތަކެއް
ބޮޑުވަޒީރު ކަމުގައި އިމްރާން ހުންނެވި އިރު ލިބިވަޑައިގެންނެވި ބައެއް ހަދިޔާ، ދައުލަތަށް ނުދައްކާ ވިއްކެވި ކަމުގެ ތުހުމަތުގައި ހައްޔަރު ކުރަން އުޅުމުން، ހުރަސް އަޅުއްވަނީ އޭނާ އަށް ތާއީދު ކުރާ އަންހެނުންނާއި ކުޑަކުދިން ނެރުއްވައިގެން ކަމަށް ޕާކިސްތާން ސަރުކާރުން ބުނެފިއެވެ.
ޕާކިސްތާންގެ ކުރީގެ ބޮޑުވަޒީރު އިމްރާން ހާނަށް ކުރާ ކޮރަޕްޝަންގެ ތުހުމަތުގައި އޭނާ ހައްޔަރު ކުރަން ކޯޓު އަމުރެއް ވަނީ ނެރެފައެވެ. އެ އަމުރާ އެއްގޮތަށް އޭނާ ހައްޔަރު ކުރަން ފުލުހުން މަސައްކަތް ފެށުމުން އޭނާގެ ސަޕޯޓަރުން ވަނީ މަގުތަކަށް ނިކުމެ މުޒާހަރާތައް ފަށާފައެވެ. ޕާކިސްތާންގެ އެކި ސަރަހައްދުތަކުގައި މުޒާހަރާ ކުރާ އިރު، ގިނަ ބަޔަކު އިމްރާން ދިރިއުޅުއްވާ ގޭގެ ކޮމްޕައުންޑް ވަށައިގެންވެސް އެބަތިއްބެވެ. އޭގެ ތެރޭގައި އަންހެނުންނާއި ކުޑަކުދިން ހިމެނޭ އިރު ފުލުހުން ވަނީ އެ ގެއަށް ވަނުމަށްޓަކައި ކަރުނަ ގޭސް ބޭނުން ކޮށްފައެވެ.
މިއާއެކު އިމްރާން ވިދާޅުވީ، އޭނާ ހައްޔަރު ކުރަން އުޅެނީ ސިޔާސީ ގޮތުން ކަމަށާއި ގާނޫނޫތަކާ ހިލާފަށް އޭނާގެ ގޭގެ ގޯތިތެރެއަށް ޕެޕާސްޕްރޭވެސް ޖަހާފައި ވާ ކަމަށެވެ. އަދި އޭނާ ހައްޔަރު ނުކުރެވޭނެ ކަމަށާއި އަންނަ ހޮނިހިރާ ހަމައަށް މުއްދަތު އޮތް ވަގުތީ ބެއިލް އެއް ލިބިވަޑައިގެންފައި ވާ ކަމަށެވެ. މީގެ އިތުރުން އޭނާ ވިދާޅުވީ، އޭނާ ހުންނެވީ ހައްޔަރު ކޮށް، ގޮޅިއަށް ލާނެ ކަމަށް ތައްޔާރުވެ ވަޑައިގެން ކަމަށާއި ގޮޅީގައި ކިތަންމެ ރެއަކު އޮންނަވަން ޖެހިވަޑައިގަތަސް ފަރުވާލެއް ނެތް ކަމަށްވެސް ވިދާޅުވެފައެވެ.
Ads by STO
