އެކަކަށް ސިމް ނެގޭ މިންވަރު ކަނޑައެޅުމުގެ މަސައްކަތް މެއި މަހު ފަށަނީ
އެކަކަށް މޯބައިލް ސިމް ނެގޭ މިންވަރު ކަނޑައެޅުމަށް ކުރަންޖެހޭ މަސައްކަތްތައް އަންނަ މެއި މަހުގެ ތެރޭގައި ފަށާނެ ކަމަށް ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އިން ވިދާޅުވެއްޖެއެވެ.
ސްކޭމް ކޯލުތައް އިތުރުވާ މައްސަލަ ދިރާސާ ކުރުމަށް ކުރަމުންދާ މަސައްކަތުގެ ތެރެއިން އެ ކޮމިޓީގެ މިއަދުގެ ބައްދަލުވުމައި ޖަވާބު ދެއްވަމުން ކޭމްގެ ޗީފް އެގްޒެކެޓިވް އިލްޔާސް އަހުމަދު ވިދާޅުވީ، އެކަކަށް ނެގޭ ސިމް ކާޑުގެ މިން ކަނޑައެޅުމުގެ މަސައްކަތް އެންމެ ލަސްވެގެން މެއި މަހުގެ ތެރޭގައި ފެށިގެންދާނެ ކަމަށާއި، އެކެެއްގެ ނަމުގައި ގިނަ ސިމްތަކެއް ނަގާފައިވާ ނަމަ އެ ސިމްތައް ވެރިފައިކޮށް އެ ފަރާތުގެ އައިޑެންޓިޓީ ވެރިފައި ކުރުމަށްފަހު އެ ލިސްޓުން ނަމްބަރުތައް ކެނޑުމުގެ މަސައްކަތް ވެސް މެއި މަހު ފެށޭނެ ކަމަށެވެ.
ސްކޭމްތައް އިތުރުވުމާ ގުޅޭގޮތުން އެސްއޯއީ ކޮމިޓީގެ އެދުމަށް ފުލުހުން ހުށަހެޅި ރިޕޯޓުގައިވެސް ފާހަގަކޮށްފައިވާ އެންމެ ބޮޑު މައްސަލައަކީ އެކެއްގެ ނަން މަތީގައި ގިނަ ސިމް ނެގޭ ގޮތަށް އޮތުމެވެ.
އެގޮތުން، ދެ ބިދޭސީއެއްގެ ނަން މަތީގައި 24،000 ސިމް ކާޑު، 12 ބިދޭސީއެއްގެ ނަމުގައި ދިރާގުގެ 38،000 ނަންބަރުގެ އިތުރުން ބައެއް ދިވެހިންގެ ނަން މަތީގައި 600 އަށް ވުރެ ގިނަ ސިމް ކާޑު ނަގައިގެން ބޭނުން ކޮށްފައިވާކަން އެ ރިޕޯޓުގައި ފާހަގަކޮށްފައިވެއެވެ.
