އެމެރިކާއިން ދަރަނީގެ ދަންތުރަ ކިޔާތީ ޗައިނާއިން ނުރުހިއްޖެ
އެމެރިކާގެ ޓްރެޜަރީ ސެކްރެޓަރީ ޖެނެޓް ޔެލެން ދެއްކެވި ވާހަކަތަކަކީ ޒިންމާދާރުކަން ކުޑަ އަދި ބޭއިންސާފު ވާހަކަތަކެއް ކަމަށް ޗައިނާއިން ބުރާސްފަތި ދުވަހު ސިފަކޮށްފައި މިވަނީ ބެއިޖިންގެ ލޯނުގެ ހަރަކާތްތަކުގެ ސަބަބުން ތަރައްގީވަމުން އަންނަ ގައުމުތައް "ދަރަނީގެ ތެރޭގައި ތާށިވެފައިވާ" ކަމަށް ޔެލެން ވިދާޅުވުމާ ގުޅިގެންނެވެ.
ޔެލެން ބުދަ ދުވަހު ވިދާޅުވީ ދުނިޔޭގެ އެކި ކަންކޮޅުތަކުގައި ޗައިނާއިން ހިންގާ ބައެއް ހަރަކާތްތަކާއި ހާއްސަކޮށް ތަރައްގީވަމުން އަންނަ ގައުމުތަކަށް ޗައިނާއިން ލޯނު ދިނުމާ މެދު ކަންބޮޑުވާ ކަމަށެވެ. ބައިނަލްއަގްވާމީ މުވައްސަސާތަކަށާއި ތަރައްގީވަމުން އަންނަ ގައުމުތަކަށް ލޯނު ދިނުމުގައި ޗައިނާގެ ނުފޫޒު ހުއްޓުވުމަށް ވޮޝިންޓަނުން ގިނަ މަސައްކަތްތަކެއް ކުރަމުން އަންނަ ކަމަށް އެކަމަނާ ވަނީ އަޑުއެހުމެއްގައި އެމެރިކާގެ ގާނޫނު ހަދާ މަޖިލީހުގެ މެމްބަރުންނާ ވާހަކަ ދައްކަވާފަ އެވެ.
ތަރައްގީވަމުން އަންނަ ގައުމުތަކުގައި އުމްރާނީ ތަރައްގީ ގެނައުމަށް ޗައިނާއިން އެތައް ސަތޭކަ ބިލިއަން ޑޮލަރެއްގެ ލޯނެއް ދީފައިވީ ނަމަވެސް، 2016 ވަނަ އަހަރުން ފެށިގެން ލޯނު ދޫކުރުން މަޑުޖެހިފައި ވަނީ ގިނަ މަޝްރޫއުތަކަކުން އަންދާޒާކުރި މާލީ ޑިވިޑެންޑް ނުދެއްކުމުންނެވެ.
"ޗައިނާއިން ދުނިޔޭގެ އެކި ކަންކޮޅުތަކުގައި ހިންގާ ބައެއް ހަރަކާތްތަކާ މެދު އަޅުގަނޑު ވަރަށް ކަންބޮޑުވޭ، ގައުމުތައް ދަރަނީގެ ތެރެއަށް ވެއްޓި، އިގްތިސާދީ ކުރިއެރުމަށް ކުރިއެރުން ނުލިބޭ ގޮތަށް ގައުމުތަކުގައި ބައިވެރިވުން،" ޔެލެން ބުދަ ދުވަހު ވިދާޅުވި އެވެ.
އޭގެ ރައްދުގައި ޗައިނާ ސަރުކާރުން ބުރާސްފަތި ދުވަހު ބުނީ ދުނިޔޭގެ ދަރަނީގެ މައްސަލަތައް އެމެރިކާއިން އިތުރަށް ގޯސްކުރީ އެމެރިކާގެ ފެޑެރަލް ރިޒާވްއިން އިންޓްރެސްޓް ރޭޓް ބޮޑުކުރުމުގެ "ހީވެސް ނުކުރާ ވަރުގެ ރޭޓެއް" ކަމަށް ބެއިޖިންއިން ސިފަކުރާތީ ކަމަށެވެ.
ޗައިނާގެ ޚާރިޖީ ވުޒާރާގެ ތަރުޖަމާނު މާއޯ ނިންގް ބުރާސްފަތި ދުވަހު ބޭއްވި ނިއުސް ބްރީފިންގައި ވިދާޅުވީ އެމެރިކާއިން ކުރާ ބޭއިންސާފު ތުހުމަތުތައް ބަލައިނުގަންނަ ކަމަށެވެ.
އަދި އެހެން ގައުމުތަކަށް އިނގިލި ދިއްކޮށް ޒިންމާދާރުކަން ކުޑަ ވާހަކަތައް ދެއްކުމުގެ ބަދަލުގައި ތަރައްގީވަމުން އަންނަ ގައުމުތަކަށް އެހީވުމަށް އެމެރިކާއިން އަމަލީ ގޮތުން ފިޔަވަޅު އަޅަން ޖެހޭ ކަމަށް މާއޯ ވިދާޅުވި އެވެ.
ޗައިނާއިން ބުނީ ބައިނަލްއަގްވާމީ އުސޫލުތަކަށް އަބަދުވެސް ބޯލަނބައި ތަރައްގީވަމުން އަންނަ ގައުމުތަކާ އެކު އިންވެސްޓްމަންޓާއި ފައިނޭންސިން އެއްބާރުލުން ދެމުން އަންނަނީ ހުޅުވާލެވިފައިވާ އަދި ދެފުށް ފެންނަ ގޮތަށް ކަމަށެވެ.
ޗައިނާއިން 2008 ވަނަ އަހަރުން ފެށިގެން 2021 ވަނަ އަހަރާ ހަމައަށް ތަރައްގީވަމުން އަންނަ 22 ގައުމެއް ބެއިލް ކުރުމަށް 240 ބިލިއަން ޑޮލަރު ޚަރަދުކޮށްފައިވާއިރު، ފާއިތުވި އަހަރުތަކުގައި އެ އަދަދު ވަނީ އިތުރުވެފަ އެވެ.
Ads by STO
