އަމީނީ މަގުގައި ތާރު އެޅުން: މަގުގެ ބޮޑު ބައެއް އަނެއްކާސް ބަންދު ކުރަނީ
އަމީނީ މަގުގެ އިތުރު ބައެއްގައި ތާރު އެޅުމުގެ މަސައްކަތަށް، އެ މަގުގެ ބޮޑު ބައެއް ބަންދުކުރަން އަނެއްކާ ވެސް ނިންމައިފިއެވެ.
އަމީނީ މަގުގައި ފުރަތަމަ ތާރު އެޅިބައި އާއްމުންނަށް ހުޅުވާލައިފައިވާއިރު، އެ މަސައްކަތަށް މިހާރު ބަންދު ކޮށްފައި ވަނީ ސްޓެލްކޯއިން ފެށިގެން ފުރުޤާން މިސްކިތާ ހަމައަށެވެ.
ފުލުހުން މިއަދު ވިދާޅުވީ، މިހާރު ބަންދު ކޮށްފައިވާ ސަރަހައްދުގެ އިތުރުން، އަންނަ ހޮނިހިރު ދުވަހުން ފެށިގެން އެ މަގުގެ އިތުރު ބައެއް ބަންދު ކުރުމަށް ނިންމާފައިވާ ކަމަށެވެ. އަދި އެއީ ފުރުޤާން މިސްކިތުން ފެށިގެން ބިލަބޮންގް ސްކޫލާ ހަމައަށް ކަމަށްވެެސް ވިދާޅުވިއެވެ.
މިހާރު އެ މަގުގެ ބަންދު ކޮށްފައި އޮތް ހިސާބުގައި ތާރު އަޅަން ފަށާނެ ދުވަހެއް އާރްޑީސީން ހާމައެއް ނުކުރެއެވެ.
އާރުޑީސީއާ ހަވާލުކޮށްގެން ހަދަމުން އަންނަ އަމީނީ މަގުގެ ފުރަތަމަ ސެގްމެންޓްގައި ތާރު އަޅާފައި ވަނީ އެމްޓީސީސީންނެވެ. ނަމަވެސް ދެން މި މަސައްކަތް ކުރާނީ އާރްޑީސީންނެވެ.
މި މަޝްރޫޢުއަށް ދަޢުލަތުގެ ބަޖެޓުން 84 މިލިއަން ރުފިޔާ ޚަރަދުވެއެވެ.
Ads by STO
