ނައީމާގެ ހަށިގަނޑުގައި އަނިޔާގެ ނިޝާންތައް ހުރިކަން ފުލުހުން ވެސް ކަށަވަރު ކޮށްދެއްވައިފި
ނ.މަނަދޫ، އުމުރުން 62 އަހަރުގެ ނައީމާ މޫސާގެ މަރުގެ މައްސަލަ ބަލަމުން އަންނަނީ، މީހަކު މަރައިލުމުގެ މައްސަލައެއްގެ ގޮތުގައި ކަމަށާއި، އޭނާގެ ހަށިގަނޑަށް އަނިޔާތަކެއް ލިބިފައިވާކަން ފުލުހުން ކަށަވަރު ކޮށްދެއްވައިފިއެވެ.
މުޅި މަނަދޫއަށް ސިހުން ގެނުވި މި މަރުގެ މައްސަލައާ ގުޅޭ ބަޔާނެއް، ފުލުހުން މިރޭ ވަނީ ނެރެއްވައިފައެވެ. އެ ބަޔާނުގައި ވިދާޅުވީ، ނައީމާގެ މަރުގެ މައްސަލައިގައި ތުހުމަތު ކުރެވޭ ކަންތައްތަކެއް ހުރުމުން، މައްސަލަ ތަހުޤީޤު ކުރަމުން އަންނަނީ "ހޯމިސައިޑް އިންވެސްޓިގޭޝަން"އެއްގެ ގޮތުގައި ކަމަށެވެ. މާނަ އަކީ، މީހަކު ނުވަތަ ބަޔަކު އޭނާ މަރައިލައިފައިވާ ކަމަށް ތުހުމަތު ކުރެވުމެވެ.
ނައީމާގެ ހަޑިގަނޑުގައި އަނިޔާތަކެއް ކޮށްފައިވާކަން އެނގުނަސް، އެ އަނިޔާގެ ތަފްސީލެއް ފުލުހުން ނުދެއްވައެވެ.
ފުލުހުން ވިދާޅުވީ، ނައީމާގެ ހަށިގަނޑުގެ ޕޯޯސްޓްމޯޓަމް ނުހަދަން ނިންމީ، ތަހުލީލަށް ބޭނުންވާ ސާމްޕަލްތައް އޭނާގެ ހަށިގަނޑުން ނަގައި، ޕޯސްޓްމޯޓަމް ހަދަން ޖެހޭ ސަބަބެއް ނެތް ކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުން ކަމަށެވެ.
އަދި އޭނާގެ ހަށިގަނޑު ޢާއިލާއާ ހަވާލު ކުރެވި، މިއަދު ހަވީރު 5:20 ހާއިރު، ވަޅު ލާފައިވާ ކަމަށްވެސް ފުލުހުން މަޢުލޫމާތު ދެއްވިއެވެ.
ފުލުހުން ވަނީ ނައީމާގެ މަރާ ގުޅުންހުރި އެއްވެސް މަޢުލޫމާތެއް ލިބިފައިވާ ފަރާތެއްވާނަމަ، ފުލުހުންގެ ސީރިއަސް އެންޑް އޯގަނައިޒްޑް ކްރައިމް ޑިޕާޓްމަންޓާ ހިއްސާ ކުރަން އެދިވަޑައިގެންފައެވެ.
ނައީމާގެ ޚަބަރެެއް ނުވެގެން، އޭނާގެ ޢާއިލާއިން ފުލުހުންނަށް ރިޕޯޓު ކުރީ ހުކުރު ދުވަހުގެ ރޭ، 6:13 ގައެވެ. ފުލުހުން ވިދާޅުވި ގޮތުގައި، އޭނާގެ ހަށިގަނޑު ފެނުނީ، ދިރިއުޅޭ ކޮޓަރީގެ ތަޅުންގަނޑު މަތީގައި އޮއްވައެވެ.
ބައެއް މީޑިއާތަކުން ރިޕޯޓް ކޮށްފައިވާ ގޮތުގައި، ނައީމާގެ ހަށިގަނޑުގެ 21 ތަނަކަށް ވަޅި ހަރާފައި ހުއްޓެވެ. އެކަނި ދިރިއުޅޭ ނައީމާގެ ފިރިއަކު ނެތްއިރު، ތިން ދަރިންވެސް ދިރިއުޅެނީ އޭނާއާ ވަކިންނެވެ.
ނައީމާ އަކި ސިހުރު ހަދާ މީހެއް ކަމަށް އެ ރަށު ބައެއް މީހުން ތުހުމަތު ކުރެއެވެ. ނަމަވެސް މިއީ ސާބިތުހިފޭ ވާހަކައެއް ނޫނެވެ.
Ads by STO
