އައި ފޯނެއް ވަގަށް ނެގުމުން އެއް އަހަރުގެ ޖަލު ޙުކުމެއް
އައިފޯން ހައެއް ވަގަށް ނެގި މީހަކު އެއް އަހަރަށް ޖަލަށް ލުމަށް ކްރިމިނަލް ކޯޓުން މިއަދު ޙުކުމް ކޮށްފިއެވެ.
ކްރިމިނަލް ކޯޓުން މި ޙުކުމް އިއްވީ ނ.މަނަދޫ، ރީހުއްސަބާ، އިސްމާއިލް އިޔާސްގެ މައްޗަށެވެ. މި މައްސަލައިގައި ދަޢުލަތުން އޭނާގެ މައްޗަށް، ވައްކަން ކުރުމުގެ ކުށުގެ ދަޢުވާ އުފުލީ، 2019 ވަނަ އަހަރުގެ ޖުލައި މަހުގެ 26 ވަނަ ދުވަހުގެ ރޭގަނޑުގެ ވަގުތެއްގައި މަޖީދީމަގުގައި ހުންނަ "ގަނޑުވަރު މޮބައިލްސް" ނަމަކަށް ކިޔާ ފިހާރައިގެ ޝޯކޭސް ތެރޭގައި ހުރި މޮބައިލް ފޯނުތަކުގެ ތެރެއިން އައިފޯން ހައެއް އެސް މޮބައިލް ފޯނެއް ވަގަށް ނަގާފައިވާތީއެވެ.
މި މައްސަލައިގެ ތަޙުޤީޤާއި ޝަރީޢަތުގެ މަޖިލީހުގައީޅި ވައްކަމުގެ ޢަމަލެއް ކޮށްފައިވާނެ ކަމަށް ބުނެ އިޔާސް ވަނީ މި ކުށުގެ ޢަމަލަށް އިޢުތިރާފުވެފައެވެ.
މި ކުށަށް ކަނޑައެޅޭ އަދަބުގެ އަސާސީ މިންގަނޑަކީ ނުވަ މަހާއި 18 ދުވަހަށް ޖަލަށްލުމެވެ. ކނަމަވެސް އޭނާގެ ކުށުގެ ރެކޯޑަށް ބަލާއިރު ދެ ދަރަޖަ މަތިކުރަންޖެހޭ ޙާލަތުތަކެއް ހުރި ކަމަށް ދައުލަތުން ބުނެފައިވެއެވެ.
އެއީ ކެނެބިސް ބޭނުން ކުރުމުގެ ދައުވާއަކާއި ވައްކަން ކުރުމުގެ ކުށެއް ސާބިތުވެފައިވާތީއެވެ.
ޝަރީއަތުގެ މަޖިލީހުގައި އިޔާސް ވަނީ ކަނޑައެޅޭ އަދަބު ޖޫރިމަނާ އަކަށް ބަދަލުކޮށްދިނުމަށް އެދިފައެވެ.
ނަމަވެސް ޝަރީޢަތުން ވަނީ، އަދަބު ޖޫރިމަނާ އަކަށް ބަދަލުކޮށްދޭން އެދުނު ނަމަވެސް ޖޫރިމަނާ ދެއްކޭނެ ފަދަ ޤާބިލުކަމެއް ހުރި ކަމެއް ނުފެންނަ ކަމަށް ބުނެ، އަދަބު ލުއި ކުރަން ނުފެންނަ ކަމަށް ކަނޑައަޅައިފައެވެ.
