އެމްޑީޕީ ގަދަކޮށް ނުކުމެ، އިންތިޚާބު ކާމިޔާބު ކުރާނެ: އަނަސް
އެމްޑީޕީ ގަދަކޮށް ނުކުމެ، މި އަހަރުގެ ރިޔާސީ އިންތިޚާބު ކާމިޔާބު ކުރާނެ ކަމަށް، އެ ޕާޓީގެ ތަރުޖަމާނު އަނަސް އަބްދުއްސައްތާރު ވިދާޅުވެއްޖެއެވެ.
އޭނާ މިފަދައިން ވިދާޅުވީ، ރާއްޖޭގެ ހުރިހައި ރަށެއްގައި އެމްޑީޕީގެ ރިޔާސީ ކެމްޕެއިން ފެށުމާ ގުޅިގެން ކުރެއްވި ޓްވީޓުތަކެއްގައެވެ.
އަނަސް ވިދާޅުވީ އެމްޑީޕީގެ ދިދަ ހުރިހައި ރަށެއްގައި އެއްފަހަރާ ވިހުރުވާލެވިފައިވާ ކަމަށެވެ. އަދި އެ ޕާޓީގެ ރަން ރީނދޫކުލައިން ރާއްޖޭގެ ރަށްތައް ޖަރީކޮށްލީ އާއްމު މެމްބަރުން އެއް އަޒުމެއްގައި ކުރިއަށް ގޮސް އެ ޕާޓީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙާއެކު، އެމްޑީޕީއަށް ދެވަނަ ދައުރެއް ކާމިޔާބުކުރުމަށް ކަމަށް އަނަސް ވިދާޅުވިއެވެ.
އޭނާ އިތުރަށް ވިދާޅުވީ، މި ސަރުކާރުގެ އެންމެ ބޮޑު ކާމިޔާބީއަކީ އެއްވެސް ރަށެއް ތަފާތު ނުކޮށް ރަށްރަށުގެ ރައްޔިތުންނަށް ޚިދުމަތްތައް ފަހިވެ، ލިބުނު ލުއި ފަސޭހަކަމާއި ހަމަޖެހުން ގެނެސްދިނުން ކަމަށެވެ.
މީގެ އިތުރުން އަނަސް ވިދާޅުވީ މުޅި ރާއްޖޭގައި އެމްޑީޕީގެ ކެމްޕޭން ހަރަކާތްތައް ބާރަށް ކުރިއަށް ގެންދާ ކަމަށާއި، މާލެއިން ދިޔަ ޓީމުތަކާއި ރަށްރަށުގައި ތިބި މެންބަރުންނާއެކު ބައްދަލުވުންތައް ބާއްވައި އެމްޑީޕީގެ ދެ ވަނަ ދައުރެއްގެ މެނިފެސްޓޯއަށް މަޢުލޫމާތު އެއްކުރުމުގެ މަސައްކަތް މިހާރު ކުރަމުންދާ ކަމަށެވެ.
އަނަސް އިތުރަށް ވިދާޅުވީ ކެމްޕޭންގެ ތެރެއިން ދޮރުން ދޮރަށް ހިނގައި، ޕާޓީގެ އާއްމު މެމްބަރުންގެ ޚިޔާލު ހޯދާފައިވާ ކަމަށެވެ.
