މާލޭގައި ހާލުގައި ދިރިއުޅޭ 17000 އަށްވުރެ ގިނަ އާއިލާ އެބަތިބި!
ގެދޮރުވެރިކަން ކޮންމެހެން ބޭނުންވާ، މާލޭގައި ހާލުގައި ދިރިއުޅޭ 17،000 އަށްވުރެ ގިނަ އާއިލާ އެބަތިބި ކަމަށް ހައުސިންގ މިނިސްޓަރ މުޙައްމަދު އަސްލަމް ވިދާޅުވެއްޖެއެވެ.
މޭލާގައި އަޅަން ނިންމާފައިވާ ހައުސިންގް ޔުނިޓްތަކާއި އެތަންތަން އެޅޭނެ ތާރީހާ ގުޅޭ ގޮތުން ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވަނީ ލިޔުމުން ޖަވާބު ހޯއްދެއްވުމަށް ފަސް ސުވާލު، ހޯމް މިނިސްޓަރަށް ފޮނުއްވާފައެވެ.
މިނިސްޓަރ އަސްލަމް ވަނީ އެސުވާލުތަކަށް ޖަވާބު ފޮނުއްވާފައެވެ. އަދި މިއަދު މަޖިލީހަށް އެމަނިކުފާނު ހާޒިރުވެ، މާލޭގެ ގެދޮރުގެ ހާލަތާއި ބެހޭ ކަރުދާހެއް ވެސް ހުށަހަޅައިދެއްވި އެވެ.
އެކަރުދާސް ހުށަހަޅުއްވާ ދެއްވަމުން ހައުސިންގ މިނިސްޓަރ ވިދާޅުވީ އެކަށީގެން ނުވާ ހާލަތުގައި 5122 މީހަކު މާލޭގައި ދިރިއުޅެމުންދާ ކަމަށާއި އެއީ 37 އިންސައްތަ މީހުން ކަމަށެވެ.
"މިހާރު ރެޖިސްޓްރީ ކުރެވިފައިވާ ބިންތަކުގެ ތެރެއިން 600 އަކަފޫޓަށްވުރެ ކުޑަތަންކޮޅެއްގައި އިމާރާތްކޮށް ދިރިއުޅެމުންދާ ކޮންމެ އާއިލާއަކީ އެއީ އެޑެކުއޭޓްކޮށް ދިރިއުޅެވޭނެ ތަނެއްކަމަށް އަޅުގަނޑުމެން ގަބޫލެއް ނުކުރަން،" މިނިސްޓަރ ވިދާޅުވިއެވެ.
އެގޮތުން އެފަދަ ކުދި ތަންކޮޅުތަކުގައި މާލޭގައި 17073 އާއިލާ ދިރިއުޅެމުންދާކަން މިނިސްޓަރ އަސްލަމް ފާހަގަ ކުރެއްވިއެވެ.
މީގެއިތުރުން މިނިސްޓަރ އަސްލަމް ވިދާޅުވީ މާލޭގައި 1336 ކައުންސިލް ހައުސިންގ ބޭނުންވާ ރައްޔިތުން ތިބިއިރު، މާލޭގައި ދިރިއުޅޭ އެހެން ރަށްރަށުގެ 3137 މީހަކު ކައުންސިލް ހައުސިންގ ބޭނުންވާ ކަމަށެވެ. އަދި އެފޯޑަބަލް ހައުސިންގ ބޭނުންވާ 2138 މާލޭ މީހަކު ތިބި އިރު މާލޭގައި ދިރިއުޅޭ އެހެން ރަށްރަށުގެ 2916 މީހަކަށް އެފޯޑަބަލް ހައުސިންގ ބޭނުންވާ ކަމަށް ވެސް ހައުސިންގ މިނިސްޓަރ ވިދާޅުވި އެވެ.
Ads by STO
