މަޖިލީހުގައި ބޮޑު ތަޅު އެޅުވީ، ކަނޑު ވިއްކައިލި މައްސަލަ ފެންމަތިވުމުން، ކަންކަން ފޮރުވަން: އިދިކޮޅު
ރައްޔިތުންގެ މަޖިލީހުގައި މަރުތަޅު އެޅުވީ، ޗާގޯސް މައްސަލައިގައި މެމްބަރުން ކުރާ ސުވާލުތަކަށް ޖަވާބު ނުދިނުމަށް ކަމަށް އިދިކޮޅު ޕީޕީއެމްގެ ޕާލިމެންޓްރީ ގްރޫޕް(ޕީޖީ)އިން ތުހުމަތުކޮށްފިއެވެ.
ޕީޕީއެމްގެ ޕީޖީން މިއަދު ބޭއްވި ނޫސްވެރިންގެ ބައްދަލުވުމެއްގައި، މަޖިލީހުގެ މައިނޯރިޓީ ލީޑަރު، އަދި އޭދަފުށި ދާއިރާގެ މެމްބަރު އަޙްމަދު ސަލީމް ވިދާޅުވީ، މަޖިލީހުގެ މެޖޯރިޓީ ލީޑަރު، މުޙައްމަދު އަސްލަމް، ދޫދެއްވައިގެން ނޫންގޮތަކަށް މަޖިލިސް ކުރިއަށް ގެންދެވޭނެ ތަނެއް ފެނިވަޑައިނުގަންނަވާ ކަމަށެވެ.
ސަރުކާރުން މަޖިލީހުގައި ބޮޑު ތަޅު އަޅުވައިފައިވާކަމަށް ތުހުމަތުކުރައްވައި އޭނާ ވިދާޅުވީ، މިކަން މި ހިސާބަށް އައީ، ކަނޑުވިއްކައިލި މައްސަލައިގައި އޭޖީ އިބްރާހީމް ރިފްޢަތު މަޖިލީހަށް ހާޒިރު ކުރެއްވުމުންވެސް، ޖަވާބު ނުދެއްވުމާއިއެކުގައި ކަމަށެވެ.
"ބަންޑާރަ ނައިބު، އަޅުގަނޑުމެން މިތަނަށް ހާޒިރު ކުރީ، އެބޭފުޅާ ހިތަށް އެރިހައި އެއްޗެއް މިތަނުގައި ވާހަކަ ދައްކާކަށް ނޫން. އަޅުގަނޑުމެން މެމްބަރުން ކުރާ ސުވާލުތަކަށް، އެއީ ރައްޔިތުން ކުރާ ސުވާލު، އެއީ އަޅުގަނޑުމެން ކުރާ ސުވާލެއް ނޫން. އެ ރައްޔިތުން ކުރާ ސުވާލުތަކަށް ޖަވާބުދާރީވުމަށްޓަކާ، އަޅުގަނޑުމެން އެކަން ކުރީ."
ސަލީމް ވިދާޅުވީ، ސަރުކާރުން މަޖިލީހުގައި ތަޅު އެޅުވީ، އޭޖީ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވައިފައިނުވާއިރު، މި މައްސަލައާ ގުޅުންހުރި ކަންކަން ސިއްރު ކުރުމުގެ ގޮތުން ކަމަށެވެ.
މި ނޫސްވެރިންގެ ބައްދަލުވުމުގައި ޕީއެންސީގެ ޕީޖީ ލީޑަރު، އަދި މަޖިލީހުގެ މަޑުއްވަރި ދާއިރާގެ މެމްބަރު އާދަމް ޝަރީފު އުމަރު ވިދާޅުވީ، މަޖިލިސް ހުއްޓުވައިފައިވަނީ ސަރުކާރުން ކަމަށާއި، ރާއްޖޭގައި މިހާރު އޮތީ، ތިން ބާރު ވަކިވެފައި އޮތް ނިޒާމެއް ނޫން ކަމަށެވެ.
އަދި މަޖިލިސް ޑެޑްލޮކެއްގައި އޮތްއޮތުން ނިމުމަކަށް ގެންނަން މެޖޯރިޓީން މަސައްކަތް ނުކުރާ ކަމަށްވެސް އޭނާ ވިދާޅުވިއެވެ.
