ބޮޑު ޢީދަށް މާލެ ދިއްލާލައިފި
ބޮޑު ޢީދަށް މާލެ ޒީނަތްތެރިކުރުމަށްޓަކައި މާލެ ސިޓީ ކައުންސިލުން ކުރާ މަސައްކަތުގެ ދަށުން، އެކިކުލަކުލައިން މާލެ ދިއްލާލައިފިއެވެ.
އަޟްހާ އީދުގެ މުނާސަބަތުގައި މާލޭގެ އެކި މަގުތަކުގައި ބޮކި ފަތިތަކާ ގިިޑިގެތައް ވަނީ ދިއްލާލައިފައެވެ.
މިގޮތުން ވިލިމާލެގެ ބައެއް ބޮޑެތި މަގުތައް ޒީނަތްތެރި ކުރުމުގެ ގޮތުން ސިޓީ ކައުންސިލުން ވަނީ "އީދު މުބާރިކް" ޖަހައި، އެކި ޑިޒައިންތަކަށް ހަދާފައިވާ ގިޑިގެތަކުގައި ބޮކިފަތި ހަރުކޮށްފައެވެ.
ގިޑިގެތަކާއި ބޮކިފަތިތައް ދިއްލާފައިވަނީ، ރޭ މަޣްރިބު ނަމާދަށް ފަހު ޖުމްހޫރީ މައިދާން ސަރަހައްދުގައި ސިޓީ ކައުންސިލުން ބޭއްވި ރަސްމިއްޔާތެއްގައެވެ. މާލޭގެ މޭޔަރު ޑރ. މުހައްމަދު މުއިއްޒާއި ކައުންސިލުގެ ބައެއް މެމްބަރުން އަދި އާންމުން އެ ރަސްމިއްޔާތުގައި ބައިވެރިވެރިވިއެވެ.
އެ ރަސްމިއްޔާތުގައި މޭޔަރު މުޒިއްޒު ވިދާޅުވީ، ރާއްޖެއަކީ 100 ޕަސެންޓު މުސްލިމް ގައުމަކަށްވާއިރު އަދި މާލެއަކީ ވެރިކަން ކުރާ ރަށަށް ވާއިރު، އީދު ފަދަ މުސްލުމުން ފާހަގަ ކުރާ މުނާސަބަތުތައް ވަރަށް ރަސްމީކޮށް ފާހަގަކުރަން ޖެހޭ ކަމަށް ޤަބޫލުކުރައްވާ ކަމަށެވެ.
ޢީދު ފާހަގަކުރުމުގެ ގޮތުން މާލޭގައި ސިޓީ ކައުންސިލުން އުޟްހިޔާ ކަތިލަން ހަމަޖެހިފައިވާކަންވެސް މޭޔަރު ފާހަގަކުރެއްވިއެވެ.
