އަންހެން ފުލުހަކަށް ގެވެށި އަނިޔާކުރި މައްސަލައެއް ބަލަން ފަށައިފި
އަންހެން ފުލުހަކަށް ގެވެށި އަނިޔާކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ވިދާޅުވީ އަންހެން ފުލުހަކަށް ގެވެށިއަނިޔާކުރި މައްސަލައެއް ހުށަހެޅުމާ ގުޅިގެން އެމައްސަލަ ފުލުހުންގެ ޚިދުމަތުން ތަހުގީގުކުރަމުންގެންދާ ކަމަށެވެ. އަދި މިމައްސަލަ ތަހުގީގުކުރުމުގެ ތެރެއިން ލިބިފައިވާ މައުލޫމާތުގެ އަލީގައި ޕްރޮފެޝަނަލް ސްޓޭޏްޑަޑްސް ކޮމާންޑުން ގެންދަނީ ތަހުގީގެއް ހިންގަމުން ކަމަށް ވިދާޅުވިއެވެ.
އެ މައްސަލަ އެންމެ ފުރަތަމަ ރިޕޯޓުކޮށްފައި ވަނީ އޮންލައިން ނޫސް "ދިޔަރެސް" އިންނެވެ. އެ ނޫހުގައި ރިޕޯޓްކޮށްފައިވާ ގޮތުގައި އެ މައްސަލަ ފެންމަތިވީ ފުލުހުންގެ ވަޒީފާގައި އުޅޭ ދެމަފިރިންގެ ތެރެއިން ފިރިހެންމީހާއާއި މި މައްސަލާގައި ޝާމިލުވާ އަންހެންކުއްޖާގެ މެދުގައި ނަހަމަ ގުޅުމެއް އޮންނަކަން ފިރިހެންމީހާގެ އަންހެނުން ފެންމަތިކޮށް ޝަކުވާކުރި ހިސާބުންނެވެ.
މިކަމާއި ގުޅިގެން ފުލުހުން ވިދާޅުވީ އެ ޚަބަރަކީ، އެކަމާ ގުޅޭގޮތުން އެ ޚިދުމަތުން މައުލޫމާތު އޮޅުންފިލުވުމަށް އެއްވެސް މަސައްކަތެއް ނުކޮށް، ލިޔެފައިވާ ދޮގު ޚަބަރެއް ކަމަށެވެ. އަދި ދިވެހި ފުލުހުންގެ ޚިދުމަތުގެ މުވައްޒަފުންގެ ޕްރޮފެޝަނަލް ކޮންޑަކްޓު ކަށަވަރުމުރުމަށް ގާނޫނުތަކުން ތަފާތު އިންތިޒާމުތައް ހަމަޖެހިފައިވާ ހިނދު، އެނިޒާމުތަކާ މެދު ރައްޔިތުންގެ އިތުބާރުގެއްލޭގޮތަށް، ޒިންމާދާރުކަމެއް ނެތި އަދި މައުލޫމާތުގެ ސައްހަކަން ބެލުމަށް އެއްވެސް މަސައްކަތެއް ނުކޮށް މިފަދަ ހައްސާސް ކަންކަމުގައި ހަގީގަތާ ހިލާފު މައުލޫމާތު ހާމަކުރުމަކީ ޚިދުމަތުން ކަންބޮޑުވާ ކަމެއް ކަމަށް ފުލުހުން ބުންޏެވެ.
