އިންޑިއާއިން އީޔޫއާއެކު ވިޔަފާރީގެ އެއްބަސްވުންތަކެއް
އިންޑިއާގެ ޓްރޭޑް މިނިސްޓަރު އިނގިރޭސިވިލާތާ އެކު މިނިވަން ވިޔަފާރީގެ އެއްބަސްވުމާ ގުޅޭ ގޮތުން އިނގިރޭސިވިލާތުގައި މަޝްވަރާ ކުރައްވާނެ ކަމަށާއި ޖުލައި 10 އިން 11 އަށް ޔޫރަޕިއަން ފްރީ ޓްރޭޑް އެސޯސިއޭޝަންގެ މިނިސްޓަރުންނާ ބައްދަލު ކުރައްވާނެ ކަމަށް ކޮމާސް އެންޑް އިންޑަސްޓްރީ މިނިސްޓްރީން ބުނެފި އެވެ.
ޓްރޭޑް މިނިސްޓަރު ޕިއުޝް ގޯޔަލް އިނގިރޭސިވިލާތުގެ ޚާރިޖީ ވަޒީރު ކެމީ ބަޑެނޯޗްގެ އިތުރުން އިނގިރޭސި ވިލާތުގެ އިންޑަސްޓްރީގެ މަންދޫބުންނާ ބައްދަލުކުރައްވާނެ ކަމަށް އެ މިނިސްޓްރީން ބުންޏެވެ.
މިނިވަން ވިޔަފާރީގެ އެއްބަސްވުމެއްގައި މައިގަނޑު ގޮތެއްގައި އިސްކަންދޭ ކަންތައްތަކާ ބެހޭގޮތުން މަޝްވަރާ ކުރުމުގެ ފުރުސަތު މި މަޝްވަރާތަކުގައި ލިބިގެންދާއިރު، "ވިޔަފާރީގެ ހުރަސްތައް ހައްލުކުރުމާއި، އިންވެސްޓްމަންޓްތައް ކުރިއެރުވުމާއި، ޓެކްނޮލޮޖީ، އިނޮވޭޝަން އަދި އިންޓެލެކްޗުއަލް ޕްރޮޕަޓީ ރައިޓްސް ފަދަ ދާއިރާތަކުން އިތުރަށް ގުޅުން ބަދަހިކުރުމާ ބެހޭ ގޮތުން މަޝްވަރާ ކުރުމުގެ ފުރުސަތު ލިބިގެންދާނެ" ކަމަށް އެ ބަޔާނުގައި ވެ އެވެ.
އިންޑިއާ އާއި އިނގިރޭސިވިލާތާ ދެމެދު ޓެރިފް ލައިންތަކާއި އިންވެސްޓްމަންޓް ޕްރޮޓެކްޝަން ގަވައިދުތަކާ މެދު ހިޔާލު ތަފާތުވުންތަކެއް އުފެދިފައިވާއިރު، ކާރާއި ރާ އެތެރެކުރުމުން އިންޑިއާއިން ނަގާ ޑިއުޓީއަށް ދޭ ލުއިތަކާ މެދު ހިޔާލު ތަފާތުވުން ވެސް ވަނީ އުފެދިފަ އެވެ.
މީގެ އިތުރުން ސްވިޒަލެންޑް، ނޯވޭ، އައިސްލޭންޑް އަދި ލިޗްޓެންސްޓައިން ހިމެނޭ ޔޫރަޕިއަން ފްރީ ޓްރޭޑް އެސޯސިއޭޝަންގެ ވަޒީރުންނާއި އޮފިޝަލުންނާ ވެސް ގޯޔަލް ބައްދަލުކުރައްވައި، އެ ފަރާތްތަކާއެކު ޓްރޭޑް އެންޑް އިކޮނޮމިކް ޕާޓްނާޝިޕް އެގްރީމެންޓަކަށް ވާސިލްވުމަށް ކުރަމުންދާ މަސައްކަތްތައް ބައްލަވާލައްވާނެ އެވެ.
