ނިޝާން ދިޔަމިނގިލީގެ ޝަރަފުގެ އިއްޒަތް ޑރ. މުސްތަފާ ލުތުފީއަށް އަރުވައިފި
ނިޝާން ދިޔަމިނގިލީގެ ޝަރަފުގެ އިއްޒަތް (ނ.ދ.ޝ.އ) ކުރީގެ އެޑިއުކޭޝަން މިނިސްޓަރު ޑރ. މުސްޠަފާ ލުތުފީއަށް ސަރުކާރުން މިއަދު އަރުވައިފިއެވެ.
ނިޝާން ދިޔަމިނގިލީގެ ޝަރަފުގެ އިއްޒަތަކީ ދައުލަތުން ދޭ ދެވަނައަށް އެންމެ މަތީ އިއްޒަތެވެ. ނިޝާން ދިޔަމިނގިލީގެ އިއްޒަތަކީ ޝަރަފުގެ އިއްޒަތަކީ އައް ސުލްތާން މުޙައްމަދު ޤިޔާސުއްދީން (ދިޔަމިނގިލި ބަންޑާރައިން) އަށެވެ.
ޑރ. މުސްޠަފާއަށް މި ޝަރަފުގެ އިއްޒަތް އަރުވާފައިވަނީ މިއަހަރުގެ މިނިވަން ދުވަސް ފާހަގަކުރަން ސޯޝަލް ސެންޓަރުގައި މިއަދު ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙެވެ.
ނިޝާން ދިޔަމިނގިލީގެ ޝަރަފުގެ އިއްޒަތް ޑރ. މުސްޠަފާއަށް އެރުވުމުގެ ކުރިން އެ ރަސްމިއްޔާތުގައިވަނީ ވީޑިއޯ ރިޕޯޓެއް ދައްކާފައެވެ. އެ ރިޕޯޓުގައިވާ ގޮތުން އެބޭފުޅާއަށް އެ އިއްޒަތް ދެއްވަން ރައީސް ޞާލިޙް ނިންމެވީ ޑރ. މުސްޠަފާއަކީ ރާއްޖޭގެ ތަޢުލީމީ ދާއިރާއަށް ވަރަށް މުހިއްމު ޚިދުމަތްތަކެއް ކޮށްދެއްވާފައިވާ ބޭފުޅަކަށް ވާތީއާއި އެ ޚިދުމަތްތަކުގެ އަގު ވަޒަންކުރުމުގެ ގޮތުންނެވެ.
ޑރ. މުސްޠަފާ ދައުލަތަށް ޚިދުމަތްކުރައްވަން ފެށްޓެވީ 31 ޖެނުއަރީ 1977 ގައި އެޑިއުކޭޝަނަލް ޕްރޮޖެކްޓް އޮފީހުގެ ޓީޗާ އެޑިއުކޭޓަރެއްގެ ގޮތުގައެވެ. އަދި އެބޭފުޅާ ދައުލަތަށް ޚިދުމަތްކުރައްވާތާ މިހާރު 46 އަހަރު ވެފައިވާއިރު، ކުރެއްވި މުހިއްމު މަސައްކަތްތަކުގެ ތެރޭގައި ތާނަ ޓައިޕް ރައިޓަރު އުފެއްދުމަށްޓަކައި ރާއްޖޭގައި އެންމެ ފުރަތަމަ ކުރި ދިރާސާގެ މަސައްކަތާއި ޓީޗަރުން ތަމްރީނުކުރުމުގެ މަސައްކަތް ހިމެނެއެވެ.
ދިވެހި ބަސް ކިޔަވައިދޭނެ ވަކި މާއްދާއެއްގެ ގޮތުގައި ފޮތްތައް ލިއުއްވުމާއި، އަތޮޅުތަކުގައި ފުރަތަމަ ޤާއިމު ކުރި ކޮމިއުނިޓީ ސްކޫލްތަކުގެ ފެންވަރު މަތިކޮށް، އަތޮޅު ތައުލީމީ މަރުކަޒުތަކަށް ބަދަލުކުރެއްވުމުގައި ވެސް ޑރ. މުސްޓަފާގެ ޚިދުމަތްތައް ފާހަގަކޮށްލެވެއެވެ.
މީގެ އިތުރުން، އެބޭފުޅާއަކީ އަކީ މުދައްރިސުންގެ ތަޢުލީމީ މަރުކަޒާއި މޯލްޑިވްސް ނެޝަނަލް ޔުނިވާސިޓީގައި ވެސް ކިޔަވައިދެއްވި ބޭފުޅެކެވެ.
2008 ވަނަ އަހަރު އެޑިއުކޭޝަން މިނިސްޓަރުކަން ޑރ. މުސްޠަފާއަށް ސަރުކާރުން ދިނީ އެމްޑީޕީގެ ފުރަތަމަ ސަރުކާރުގައި އޭރުގެ ރައީސް މުޙައްމަދު ނަޝީދެވެ. އޭގެ ފަހުން މޯލްޑިވްސް ނެޝަނަލް ޔުނިވާސިޓީގެ ޗާންސެލާކަން ވެސް އެބޭފުޅާވަނީ ކުރައްވާފައެވެ.
