ބްރިކްސް ސަމިޓަށް އިންޑިއާގެ ބޮޑުވަޒީރު މޯދީ ދެކުނު އެފްރިކާއަށް ވަޑައިގަންނަވަނީ
ބްރިކްސް ގްރޫޕް އޮފް ނޭޝަންސްގެ ސަމިޓްގައި ބައިވެރިވެވަޑައިގަތުމަށް އިންޑިއާގެ ބޮޑުވަޒީރު ނަރެންދުރަ މޯދީ ޖޮހަނެސްބާގަށް ވަޑައިގަންނަވާނީ މި މަހު ކަމަށް އިންޑިއާ ސަރުކާރުން ބުނެފި އެވެ.
ބްރިކްސްގެ މިހާރުގެ ފަސް މެންބަރުން ކަމަށްވާ ބްރެޒިލް، ރަޝިއާ، އިންޑިއާ، ޗައިނާ އަދި ސައުތު އެފްރިކާ ގެ ބައްދަލުވުން އޮންނާނީ އޮގަސްޓް މަހުގެ 22-24 އަށެވެ.
ދުނިޔޭގެ ކަންކަމުގައި އެމެރިކާ އިސްވެ އޮވެ ހުޅަނގުގެ އިސްތިއުމާރީ ބާރު ކަނޑުވާލުމުގެ މަގްސަދުގައި އުފައްދާފައިވާ މި ޖަމިއްޔާ އިތުރަށް ފުޅާކުރުމާ ބެހޭ ގޮތުން މަޝްވަރާ ކުރުމަށް ޗައިނާ އާއި ރަޝިއާއިން ވަނީ ޝައުގުވެރިކަން ފާޅުކޮށްފަ އެވެ. އިތުރު މެމްބަރުން ބަލައިގަތުމާ މެދު އިންޑިޔާގެ އިއުތިރާޒެއް އެބައޮތެވެ.
އިންޑިއާގެ ސަރުކާރުން ބުނީ ދެކުނު އެފްރިކާގެ ރައީސް ސިރިލް ރަމަފޯސާއާ މޯދީ ފޯނުން ގުޅުއްވައި ވާހަކަފުޅު ދެއްކެވި ކަމަށެވެ.
ސައުތު އެފްރިކާގެ ރައީސް ވިދާޅުވީ މިއަހަރު ފަހުކޮޅު ބާއްވާ ޖީ-20 ސަމިޓަށް އިންޑިއާއަށް ވަޑައިގަތުމަށް ޝައުގުވެރިވާ ކަމަށެވެ.
ޖީ-20 ގްރޫޕްގެ ރިޔާސަތު އޮންނަ އިންޑިއާއަކީ ސެޕްޓެމްބަރު މަހުގެ ކުރީކޮޅު އެ ޖަމާއަތުގެ ލީޑަރުންގެ ސަމިޓެއް ބޭއްވުމަށް ހަމަޖެހިފައިވާ ގައުމެކެވެ.
