ރިޔާސީ އިންތިޚާބުގައި ރައީސް ޔާމީނަށް ވާދަނުކުރެވޭ!
އަންނަ ރިޔާސީ އިންތިޚާބުގައި ޕީޕީއެމްގެ ކެނޑިޑޭޓް، ކުރީގެ ރައީސް ޔާމީން އަބްދުލްޤައްޔޫމުގެ ކެނޑިޑެސީ އިލެކްޝަނުން ބަލައި ނުގަތީ ރަނގަޅަށް ކަމަށް، ސްޕްރީމް ކޯޓުން ނިންމައިފިއެވެ.
ކެނޑިޑޭޓްގެ ޝަރުތު ހަމަނުވާ ކަމަށްބުނެ ރައީސް ޔާމީންގެ ކެނޑިޑަސީ ބަލައި ނުގަތް މައްސަލަ ސްޕްރީމް ކޯޓަށް ދުސްތޫރީ މައްސަލައެއްގެ ގޮތުގައި ވަނީ ހުށަހަޅާފައެވެ. އެ މައްސަލަ ނިމިފައިވަނީ ރައީސް ޔާމީނާ ދެކޮޅަށެވެ.
ރައީސް ޔާމީނަށް އިންތިހާބުގައި ވާދަނުކުރެވޭނެ ކަމަށް ހުކުމް ކުރީ ސުޕްރީމް ކޯޓުގެ ހަތް ފަނޑިޔާރުންގެ އިއްތިފާގުންނެވެ.
މި މައްސަލާގައި ހުކުރު ދުވަހު ސުޕްރީމް ކޯޓުގައި ހަތް ގަޑިއެއްހާއިރު ވަންދެން އަޑުއެހުންތައް ވަނީ ކުރިޔަށް ގެންގޮސްފައެވެ.
އަންނަ މަހުގެ ނުވަ ވަނަ ދުވަހު ބާާއްވާ ރިޔާސީ އިންތިޚާބުގައި ވާދަކުރުމަށް ރައީސް ޔާމީންގެ ކެންޑިޑެސީ ފޯމް މިދިޔަ ހަފްތާގެ އާދީއްތަ ދުވަހު ހުށަހެޅުމުން ބަލައި ނުގަންނަން އީސީން ނިންމީ ރިޝްވަތާއި މަނީ ލޯންޑަރިންގެ ކުށުގައި 11 އަހަރުގެ ޖަލު ހުކުމެއް ތަންފީޒުކުރަމުން ދާތީ އާއި އެ ޙުކުމާ ގުޅިގެން ދައްކަންޖެހޭ ފަސް މިލިއަން ޑޮލަރު ނުދައްކާ އޮތުމުން އެއީ ސާބިތު ދަރަންޏެއް ނުދައްކާ އޮތުން ކަމަށް ވެސް ބަލައިފައެވެ.
ޖިނާއީ ކުށެއްގައި 12 މަސް ދުވަހަށް ވުރެ ދިގު މުއްދަތެއްގެ ޙުކުމެއް ތަންފީޒުކުރަމުންދާ މީހަކު ކަމުގައި ނުވުމާއި އެފަދަ ޙުކުމެއް ކުރެވިފައިވާ މީހަކު ނަމަ، އެ ޙުކުމް ތަންފީޒުކޮށް ނިމުނުތާ ނުވަތަ މާފު ދިންތާ ތިން އަހަރު ވެފައި ވުމަކީ ރިޔާސީ އިންތިޚާބަށް ކުރިމަތިލާ މީހެއްގެ ކިބައިގައި ހުންނަން ޖެހޭނެ ކަމަށް ޤާނޫނު އަސާސީގައި ބުނާ ޝަރުތެކެވެ.
އެކަމަކު ރައީސް ޔާމީންގެ ފަރާތްޕުޅުން ސުޕްރީމް ކޯޓުގައި ބުނީ ޤާނޫނު އަސާސީގައި އެ ބުނަނީ ނިހާއީ ޙުކުމެއްގެ ވާހަކަ ކަމަށެވެ.
ރައީސް ޔާމީންގެ ޙުކުމް ހައި ކޯޓުގައި އިސްތިއުނާފުކޮށްފައި ވާތީ އަދި އެ ހުކުމް ބަދަލުވެދާނެ ކަމަށާއި އެހެންވެ ޤާނޫނު އަސާސީގައި ބުނާ އިންތިޚާބުތަކުގައި ވާދަކުރުމުގެ އަސާސީ ޙައްޤު ލިބެން ޖެހޭނެ ކަމަށް ވަނީ ވަކާލާތުކޮށްފައެވެ.
(ތަފްޞީލު އަންނަނީ.....)
