ބުނީ ނުވާނެއޭ، މި ދަނީ ފުއްދަމުން: ރައީސް ޞާލިޙު
2018 ވަނަ އަހަރު ރައީސް އިބްރާހީމް މުޙައްމަދު ޞާލިޙުގެ ސަރުކާރުން ވެފައިވާ ވަރަށް ގިނަ ވަޢުދު ނުފުއްދޭނެ ކަމަށް ފާޑުކިޔާ ފަރާާތްތަކުން ބުނި ކަމަށާއި، ނަމަވެސް ވަޢުދުތައް ފުއްދަމުން އަންނަ ކަމަށް އެމަނިކުފާނު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ، ގދ.ހޯނޑެއްދޫގައި މިއަދު ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.
ރައީސް ޞާލިޙު ވިދާޅުވީ ސިއްހީ ޚިދުމަތްތެރިންގެ މުސާރަ ބޮޑު ކުރުމާއި، ހިލޭ ޑިގްރީއަށް ކިޔަވައި ދިނުން ފަދަ ކަންކަން ނުވާނެ ކަމަށް ފާޑު ކިޔާ ފަރާތްތަކުން ބުނަމުން ދިޔަ ނަމަވެސް، އެއީ ފުއްދައިފައިވާ ވަޢުދުތައް ކަމަށެވެ.
"އަޅުގަނޑުމެން، މެނިފެސްޓޯގައި ލިޔުނު ކޮންމެ ކަމަކަށް ޖަވާބު ދެމުން ގެންދިޔައީ، ނުވާނެއޭ. މިނިމަމް ވޭޖުގެ ވާހަކަ ދެއްކީމަ ވެސް ބުނީ، ނުވާނެއޭ. އެކަން ހަމަޖެހި ނިމިއްޖެ."
ރައީސް ޞާލިޙުގެ ވާހަކަފުޅުގައި މިނިމަމް ވޭޖު، ނުވަތަ އެންމެ ކުޑަ އުޖޫރަ ކަނޑައެޅުމަކީ އެއްވެސް ސަރުކާރަކަށް ކުރަން ނުކެރުނު ކަމެއް ކަމަށް ވެސް ވިދާޅުވިއެވެ.
މުސާރަ ބޮޑު ކުރަން އުޅުމުން، އިދިކޮޅު ފަރާާތްތަކުން އެކަން ވެސް ނުވާނެ ކަމަށް ބުނިއިރު، އެ ވަޢުދު ވެސް ފުއްދިފައިވާކަން ރައީީސް ފާހަގަކުރެއްވިއެވެ.
