އާބާދީ މަދުވިޔަސް، ތަރައްޤީ ގެނައުމުގައި ތަފާތެއް ނުކުރަން: ރައީސް
އާބާދީ މަދު ވިޔަސް، ތަރައްޤީ ގެނައުމުގައި އެއްވެސް ރަށެއް ތަފާތު ނުކުރައްވާނެ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރިޔާސީ އިންތިޚާބުގެ ކެމްޕެއިނަށް، ދ.ރިނބުދުއަށް ވަޑައިގެން، އެރަށުގެ ބައެއް މަޝްރޫޢުތަކުގެ ނިމުން ފާހަގަކުރައްވައި، ރައީސް ޞާލިޙު ވިދާޅުވީ ރިނބުދޫ އަކީ އާބާދީ ކުޑަ ރަށެއް ކަމުގައި ވިޔަސް، 2018 ވަނަ އަހަރުން ފެށިގެން، މިހައިތަނަށް ވެސް ސަރުކާރުން އެ ރަށުގައި ގިނަ މަޝްރޫޢުތައް ހިންގައިފައިވާ ކަމަށެވެ.
"މިއީ މިފަދަ ރަށަކުން އުއްމީދު ކުރި ކަންކަމެއް ވެސް ނޫން. އެހެންނަމަވެސް، މި ސަރުކާރު މި އަންނަނީ، ރާއްޖޭގެ ހުރިހައި ރަށެއްގައި، ވަކި ރަށެއް ތަފާތު ނުކޮށް، ފެނާއި ނަރުދަމާގެ ނިޒާމް ޤާއިމު ކުރުމުގެ މަސައްކަތް ކުރަމުން."
ރައީސް ޞާލިޙު ވިދާޅުވީ، މި އަހަރު ނިމޭއިރު، ސާފު ބޯފެނާއި، ފެނާއި ނަރުދަމާގެ ޚިދުމަތް ނުލިބޭ އެއްވެސް ރަށެއް ރާއްޖޭގައި ނޯންނާނެ ކަމަށެވެ.
"އެގޮތުން މިހާރު ވެސް، 141 ރަށެއްގައި، އެ މަސައްކަތް އެބަ ކުރިއަށްދޭ،"
ރައީީސް އިތުރަށް ވިދާޅުވީ، މި ސަރުކާރުގެ ފަސް އަހަރުގެ ތެރޭގައި 125 ރަށެއްގެ ބަނދަރު ވެސް ތަރައްޤީ ކޮށްފައިވާ ކަމުގައެވެ.
