ކުރީ ސަރުކާރުން ވަނީ މަސްވެރިންނަށް 38 މިލިއަން ރުފިޔާ ދަރާފައި: ރައީސް ޞާލިޙު
މި ސަރުކާރު ޙަވާލުވީއިރު، ކުރީ ސަރުކާރުން މަސްވެރިންނަށް 38 މިލިއަން ރުފިޔާ ދަރާފައިވާ ކަމަށް ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ރައީސް ޞާލިޙު މިހެން ވިދާޅުވީ، ގއ.ދެއްވަދޫގައި ބޭއްވި ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. ރައީސް ޞާލިޙު ވިދާޅުވީ މަސްވެރިންނަށް ދޭން ޖެހޭ ފައިސާ، އެމަނިކުފާނުގެ ސަރުކާރުން ދައްކާ ނިންމައިފައިވާ ކަމަށެވެ.
"އަދި މަސްވެރިން ބާނާ މަހަށް، ލަސްނުވެ ފައިސާ ލިބޭ ގޮތް، އިރާދަކުރެއްވިއްޔާ، އިންތިޒާމް ކުރެވިގެން އެބަދޭ."
މަސްވެރިންނަށްޓަކައި ސަރުކާރުން ކޮށްދެމުން އަންނަ އިތުރު ކަންކަމަށް އަލިއަޅުވައިލައްވައި ރައީސް ޞާލިޙު ވިދާޅުވީ، މަސްވެރިންނަށް ފަސޭހައިން އައިސް ލިބޭނެ ގޮތް ހެދުމަށްޓަކައި އައިސްޕްލާންޓްތައް ޤާއިމު ކުރަމުން އަންނަ ކަމަށެވެ.
އަދި ވިދާޅުވީ ޔޫރަޕިއަން ޔޫނިއަން(އީޔޫ) އާއިއެކުގައި ވެވޭ އެއްބަސްވުމާއިއެކުގައި ލަސްތަކެއް ނުވެ، މަހަށް ބޮޑު އަގު ވެސް ލިބިގެންދާނެ ކަމަށެވެ.
މީގެ އިތުރުން ރައީސް ޞާލިޙު ވަނީ އުފާވެރި އަމާާން ރާއްޖެއެއް ބިނާ ކުރުމަށްޓަކައި ތަޢުލީމީ ޖީލެއް ބިނާކޮށް އުމްރާނީ ވަސީލަތްތައް ޤާއިމު ކުރުމުގެ މުހިންމުކަން ފާހަަގަކުރައްވައި، ސަރުކާރުން އެކަންކަމަށް ބޮޑު އިސްކަމެއް ދެއްވާ ކަމުގައި ވިދާޅުވެފައެވެ.
