ދެވަނަ ދައުރެއްގައި، ޒުވާނުންނާއި ކުޅިވަރާއި ބެހޭ ވުޒާރާ ހިންގާނީ ވަކިން: ރައީސް
ރައީސް އިބްރާހިމް މުޙައްމަދު ޞާލިޙު ދެ ވަނަ ދައުރަކަށް އިންތިޚާބުވެއްޖެ ނަމަ ޔޫތު އަދި ސްޕޯޓްސް މިނިސްޓްރީ ވަކިން ހިންގަވާނެ ކަމަށް އެމަނިކުފާނު ވިދާޅުވެއްޖެއެވެ.
އެމަނިކުފާނު މިކަން ހާމަކުރައްވައިފައިވަނީ، ނ.އަތޮޅަށް ކުރައްވާ ކެމްޕޭން ދަތުރުފުޅުގައި އެ އަތޮޅުގެ ލަންދޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ޒުވާނުންނަށް އިތުރު ސަމާލުކަން ދޭންޖެހޭކަން ފާހަގަކުރައްވައި ރައީީސް ޞާލިޙު ވިދާޅުވީ، ޒުވާނުންނާއި ކުޅިވަރަށް އިތުރަށް ސަމާލުކަން ދޭންޖެހޭ ކަމުގައެވެ.
"މި ދެ ދާއިރާއަށް އިތުރަށް ފޯކަސް ކުރުމަށްޓަކައި ދެ ދާއިރާ ވަކިކޮށް ދެ މިނިސްޓްރީއެއްގެ ދަށަށްލައި ސިޔާސަތުތައް ތަންފީޒު ކުރަމުންގެންދާނަން."
ރައީސް އިތުރަށް ވިދާޅުވީ ޔޫތު އެންޑް ސްޕޯޓްސް އެއްކޮށްލައިފައިވުމުން، ޒުވާނުންގެ ޝަކުވާތައް އެބަހުރި ކަމަށެވެ.
ރައީސް ޞާލިޙު ވިދާޅުވީ ޒުވާނުންނަކީ މާދަމާ ޤައުމު ހިންގަން ތިބި މީހުން ކަަމަށްވާއިރު، އެ މީހުންނަށް ބަސްބުނުމުގެ ފުރުސަތުދީ ޒުވާނުންނާ ގުޅޭ ސިޔާސަތުތައް ހަދާއިރު އެ މީހުން ބައިވެރިކުރަންޖެހޭ ކަމަށެވެ.
ރޭ ނ.ވެލިދޫގައި ބޭއްވި ޖަލްސާގައި ނެރުނު އެމްޑީޕީގެ މެނިފެސްޓޯގެ "އާ ޒުވާން ޖީލު" ސިޔާސަތުގައި ވަނީ ޒުވާނުން އިތުރަށް ބާރުވެރިކުރުމަށްޓަކައި ގިނަ ކަންކަން ހިމަނައިފައެވެ.
