ދެވަނަ ދައުރެއް ދޭށޭ ބުނަން ލަދު ނުގަނޭ ބާއޭ ހިތަށް އަރާ: ޤާސިމް
ވެރިކަމުގެ ދެވަނަ ދައުރެއް ދެއްވަން އެދިވަޑައިގަންނަވަން، ރައީސް އިބްރާހީމް މުޙައްމަދު ޞާލިޙު ލަދުފުޅު ނުގަނޭ ބާއޭ ހިތްޕުޅަށް އަރައިވަޑައިގަންނަވާ ކަމަށް ޖޭޕީގެ ރިޔާސީ ކެންޑިޑޭޓް، ޤާސިމް އިބްރާހީމް ވިދާޅުވެއްޖެއެވެ.
ޤާސިމް މިފަދައިން ވިދާޅުވީ، އދ.ކުނބުރުދޫގައި މިއަދު ސަޕޯޓަރުންނާއިއެކުގައި ބޭއްވެވި ބައްދަލުކުރެއްވުމުގައެވެ. އެނާ ވިދާޅުވީ، އެމްޑީޕީ އަކީ ގޯޯސް ޕާޓީއެއް ނޫން ކަމަށާއި، މައްސަލަ އަކީ ޕާޓީގެ އިސްބޭފުޅުން ޢަމަލު ކުރައްވާ ގޮތް ަކަމަށެވެ.
"އަޅުގަނޑުމެން އަމާންކަމަށްޓަކައި، މިނިވަންކަމަށްޓަކައި ލާ ވޯޓަކަށް ހަދަން ޖެހޭ، 9 ސެޕްޓެމްބަރުގައި ލާ ވޯޓު." ޤާސިމް ވިދާޅުވިއެވެ.
ޤާސިމް ވިދާޅުވީ، ރައްޔިތުން ވޯޓު ދޭން ޖެހޭނީ ވަކި ސިޔާސީ ޕާޓީއަކަށް ނިސްބަތްވެވަޑައިގަންނަވާ ބޭފުޅަކަށް ނުވަތަ ތިމާގެ މީހަކަށް ނޫން ކަމަށާއި، ވޯޓު ދޭންވީ އިޙްލާސްތެރިކަމާއިއެކުގައި ޤައުމަށް ޚިދުމަތް ކުރައްވާނެ ބޭފުޅަކަށް ކަމަށެވެ.
އޭނާ ވިދާޅުވީ ސިޔާސީ މަސައްކަތަށް ނުކުމެވަޑައިގަތީ އިސްލާހަށް މަސައްކަތް ކުރެއްވުމަށް ކަމަށާއި، އެހެންނަމަވެސް ޤައުމު ވަނީ ފަހަތަށް ސޮއްސައިލައިފައި ކަމަށެވެ.
"މިނިވަންކަން ގެއްލި، ޤައުމު ދަރަނިވެރިވެ، މިގޮތަށް ކަންތައްތައް ދާތީ."
ޤާސިމް ވަނީ ރިޔާސީ އިންތިޚާބަށް ވަގުތު ކައިރިވަމުން ދިޔަ ވަރަކަށް ސަރުކާރު ކުންފުނިތަކުން ގިނަ އަދަދަކަށް ވަޒީފާ ދެމުން އަންނާތީ އެކަމަށް ވެެސް ފާޑުވިދާޅުވެފައެވެ.
