ސީސީޓީވީއާއި ޓްރެފިކް ލައިޓުތަކަށް ހުރަސް އެޅޭ ގޮތަށް ހުރި ކެމްޕޭން ޕޯސްޓަރުތައް ނަގަން އަންގައިފި
މާލޭގެ އެކި ސަރަހައްދުތަކުގައި ދިވެހި ފުލުހުންގެ ޚިދުމަތުން ހަރުކޮށްފައިވާ ސީސީޓީވީ ކެމެރާއާއި ޓްރެފިކް ލައިޓުތަކަށް ހުރަސް އެޅޭގޮތަށް ހަރުކޮށްފައި ހުރި ކެންޕޭން ޕޯސްޓަރު އަދި ބެނާތައް ނަގަން އިލެކްޝަންސް ކޮމިޝަން (އީސީ) އިން އަންގަވަފިއެވެ.
އީސީގެ ނާއިބު ރައީސް އިސްމާޢީލް ޙަބީބު މިއަދު ކުރެއްވި ޓްވީޓެއްގައި ވިދާޅުވީ ފުލުހުން ހަރުކޮށްފައިވާ ސީސީޓީވީ ކެމެރާތަކާއި މަގުތަކާއި ބްރިޖުގައި ބަހައްޓާފައިވާ ތްރެފިކް ލައިޓުތަކުގެ މަންޒަރަށް ހުރަސްއެޅޭގޮތަށް ކެންޕޭން ތަކެތި ހަރުކުރާކަން ފާހަގަކުރެވިފައިވާކަމަށާއި، މި ތަކެތި 24 ގަޑިއިރުގެ ތެރޭގައި ނެގުމަށް ޕާޓީތަކަށާއި ކެނޑިޑޭޓުންނަށް އަންގާފައިވާނެކަމަށެވެ.
"އަދި ކެންޑިޑޭޓުންގެ ރަސްމީ އިންތިޚާބީ އޭޖެންޓުންނާ އެކީގައި އީސީއާއި، މޯލްޑިވްސް ޕޮލިސް ސާވިސްއިން ބައްދަލުކުރި ދުވަހު ވެސް މި ވާހަކަތައް ވާނީ ދަންނަވާފައި. މިދެންނެވި ފަދަ ޤަވާއިދާ ޚިލާފު ކަންކަން ނުކުރުމަށް އެންމެހައި ފަރާތްތަކަށް އިލެކްޝަންސް ކޮމިޝަނުން އިލްތިމާސް ކުރޭ" ހަބީބު ވިދާޅުވިއެވެ.
މަގުތަކާއި އިމާރާތްތަކުގައި ކެންޕޭން ޕޯސްޓަރު އަދި ބެނާ ފަދަ ތަކެތި ހަރުކުރާއިރު، އިންތިޚާބުތަކާ ބެހޭ ގާނޫނުތަކާއި ޤަވާއިދުތަކާއި ކެންޑިޑޭޓުންނަށް އިރުޝާދު ދީފައިވާ ގޮތުގެ މަތިން، ހުއްދަ ނަގަންޖެހޭ މީހުންގެ ފަރާތުން ހުއްދަ ލިބިގެން މެނުވީ ނުކުރުމަށްވެސް ހަބީބު އެދިވަޑައިގެންފައިވެއެވެ.
"މި ދެންނެވި ފަދަ ކަންކަން ހުއްޓުވުމަށް، ކޮންމެ ފަހަރަކު، ފުލުހުން ބޭނުންކުރުމަކީ ކޮމިޝަނުން ބޭނުންވާ ގޮތެއްނޫން. އެހެންކަމުން، ޕާޓީތަކުން މިހާރަށް ވުރެ ޒިންމާދާރު ކަމާއެކު، މިފަދަ ކަންކަމުގައި، ޢަމަލު ކުރެއްވުން އެދެން" ހަބީބް ވިދާޅުވިއެވެ.
މި އަހަރުގެ ރިޔާސީ އިންތިޚާބަށް ވަގުތު ކުޑަތަންވަމުން އަންނައިރު، މި އިންތިޚާބަކީ މިހާތަނަށް އެންމެ ގިނަ ކެނޑިޑޭޓުން ވާދަކުރާ އިންތިޚާބެވެ. އެހެންކަމުން ސިޔާސީ ޕާޓީތަކުން އަންނަނީ ކުލަ ގަދަކޮށް ކެންޕޭންގެ ހަރަކާތްތައް ބާއްވަމުންނެވެ.
