ޔަހޫދީންގެ ހަމަލާަކުގައި ޝަހީދުކޮށްލި މައުސޫމް ތުއްތު ކުދިންގެ އަދަދު 700އަށްވުރެ މަތި!
އިޒްރޭލްގެ ޔަހޫދީން ފަލަސްޠީނުގެ ޣައްޒާއަށް ދިން ހަމަލާތަކުގައި 700އަށްވުރެ ގިނަ ކުޑަކުދިން ޝަހީދު ކޮށްލައިފިއެވެ.
ހައްދުފަހަނައަޅައިފައިވާ ޔަހޫދީން ޣައްޒާއަށް ހަމަލާ ދޭން ފެށީ، މި މަހުގެ ހަތް ވަނަ ދުވަހުއެވެ. ޔަހޫދީންގެ އަނިޔާވެރި ހަމަލާތަކުގެ މައިގަނޑު އަމާޒަކަށް ވެފައި ވަނީ އެއްވެސް ކުށެއް ނެތް ތުއްތު ކުދިންނާއި އަންހެނުންނެވެ.
ބައިނަލްއަޤްވާމީ މީޑިއާތަކުން ރިޕޯޓް ކުރާ ގޮތުގައި، މި މަހުގެ ހަތްވަނަ ދުވަހު ދޭން ފެށި ހަމަލާތަކުގައި މިހައިތަނަށް 724 ކުޑަކުދިން ވަނީ ޝަހީދުކޮށްލައިފައެވެ.
މި މަހުގެ 12 ވަނަ ދުވަހު އިޒްރޭލުން ވަނީ، ޣައްޒާގެ އުތުރުގައި ދިރިއުޅޭ 1.1 މިލިއަން މީހުން، އެ ސިޓީގެ ދެކުނަށް ބަދަލުވުމަށް އަންގައިފައެވެ. އެމީހުންނަށް ޣައްޒާގެ ދެކުނަށް ދިޔުމަށް ޔަހޫދީން ދިނީ 24 ގަޑިއިރުގެ މުހުލަތެކެވެ.
ޔަހޫދީންގެ ހަމަލާތަކުގައި ފަލަސްޠީނުގެ 2،215 މީހުން ޝަހީދުވެފައިވާއިރު، 8،000އަށްވުރެ، ގިނަ މީހުން ވަނީ ޒަޚަމް ވެފައެވެ.
