އިންތިޚާބީ ރައީީސް ހުވާ ކުރައްވާ ރަސްމިއްޔާތު އަންނަ މަހުގެ 17 ވަނަ ދުވަހުގެ ހަވީރު 4:45ގައި

އިންތިޚާބީ ރައީސް ޑރ.މުޙައްމަދު މުޢިއްޒު ރައީސުލްޖުމްހޫރިއްޔާކަމުގެ ހުވާ ކުރެއްވުމަށް ބާއްވަވާ ޖަލްސާ އޮންނާނީ ނޮވެމްބަރު 17 ވަނަ ދުވަހުގެ ހަވީރުގައި ކަމަށް ރައްޔިތުންގެ މަޖިލީހުގެ އިދާރާއިން ހާމަކުރައްވައިފިއެވެ.

Ads by STELCO

އިންތިޚާބީ ރައީސާއި އިންތިޚާބީ ނާއިބު ރައީސް ހުވާކުރުމަށް ބާއްވަވާ ޖަލްސާގެ އިންތިޒާމުތަކާ ގުޅޭގޮތުން ރައްޔިތުންގެ މަޖިލީހާއި، އެމްއެންޑީއެފްއާއި އިންތިޚާބީ ރައީސްގެ ފަރާތްޕުޅުން އުފައްދަވާފައިވާ، އިންތިޤާލީ ކޮމެޓީގެ މެންބަރުން ބޭއްވެވި ބައްދަލުވުމުގައި ނިންމަވައިފައި ވަނީ، ހުވާ ކުރެއްވުމުގެ ޖަލްސާ އޮންނާނީ އެ ދުވަހުގެ ހަވީރު 16:45 ގައިކަމުގައެވެ.

އިންތިޚާބީ ރައީސާއި ނާއިބު ރައީސް ހުވާކުރުމަށް ބާއްވާ ޖަލްސާ ބޭއްވެވުމަށް ނިންމަވާފައިވަނީ ޖުމްހޫރީ މައިދާނުގައެވެ. މި ރަސްމިއްޔާތުގައި އާއްމުންނަށް ވެސް ބައިވެރިވެވޭނެއެވެ.

ސެޕްޓެމްބަރު މަހުގެ 30 ވަނަ ދުވަހު ބޭއްވި ރިޔާސީ އިންތިޚާބުގެ ދެވަނަ ބުރުގައި، އެމްޑީޕީގެ ކެންޑިޑޭޓް ރައީސް އިބްރާހިމް މުޙައްމަދު ޞާލިޙުގެ މައްޗަށް މުޢިއްޒު ކާމިޔާބު ހޯއްދެވީ 126،842 ވޯޓުން ނުވަތަ 53.9 ޕަސެންޓުންނެވެ.

ރައީސް އިބްރާހީމް މުޙައްމަދު ޞާލިޙަށް ހޯއްދެވުނީ 108،500 ވޯޓެވެ. އެއީ 46.1 ޕަސެންޓްއެވެ.