ތިލަފުށި ފޭސް 2 ގެ އޭރިއާ "ބީ " ހިއްކާ ނިމި، އޭރިއާ "އޭ" ހިއްކުމުގެ މަސައްކަތް ފަށައިފި
ތިލަފުށި ފޭސް 2 ގެ އޭރިއާ "ބީ" ހިއްކާ ނިމި، އޭރިއާ "އޭ" ހިއްކުމުގެ މަސައްކަތް ފަށައިފިއެވެ.
މިކަން ހާމަކުރައްވައި، އާބަންކޯ އިން މިއަދު ވިދާޅުވީ ތިލަފުށީ ފޭސް 2 ހިއްކުމަށް ކަނޑައެޅިފައިވާ އޭރިއާތަކުގެ ތެރެއިން ފުރަމަތަމަ އޭރިއާ (އޭރިއާ ބީ) ހިއްކާ ނިމިފައިވާ ކަމަށެވެ.
އެގޮތުން މިއީ 39.6 ހެކްޓަރގެ ސަރަހައްދެއް ކަމަށާއި މި އޭރިއާ ހިއްކާ ނިމުމާ އެކު، އޭރިއާ "އޭ" ހިއްކުމުގެ މަސައްކަތް މިހާރު ދަނީ ކުރަމުން ކަމަށް އެ ކުންފުނިން ހާމަކުރައްވައެވެ.
އާބަންކޯ އިން ވިދާޅުވީ، އޭރިއާ "އޭ" ހިއްކުމުގެ މަސައްކަތް އަންނަ އަހަރު ފެބްރުއަރީ މަސް ތެރޭގައި ނިންމާލެވޭނެ ކަމަށެވެ.
އޭރިއާ "އޭ" ގެ ގޮތުގައި ހިއްކުމަށް ހަމަޖެހިފައި ވަނީ 71.5 ހެކްޓަރ ގެ ސަރަހައްދެއް ކަމަށް އެ ކުންފުނިން ހާމަކުރައްވައެވެ.
އާބަންކޯ އިން ވިދާޅުވީ، ތިލަފުށީގެ ސިނާއީ މަޝްރޫއަކީ ދިވެހި ސަރުކާރުގެ ލަފަޔާއި އިރުޝާދުގެ ދަށުން އެ ކުންފުނިން ކުރިއަށް ގެންދާ މަޝްރޫޢެއް ކަމަށެވެ.
ތިލަފުށީގެ ބިން ހިއްކާ ނިމުމުން، ތިލަފުށި މާސްޓަރ ޕްލޭންގެ ދަށުން އުމްރާނީ މަސައްކަތްތައް ކުރުމަށާއި ވިޔަފާރީގެ ބޭނުންތަކަށް ޖާގަ ތަނަވަސްކޮށްދިނުމުގެ ގޮތުން ބޮޑެތި ބިންތައް ދޫކުރުމަށް ކަނޑައެޅިފައިވާ ކަމަށާއި މިކަމުގެ ސަބަބުން ތަރައްޤީގެ މަސައްކަތްތަކާއި އިޤްތިޞާދީ ހަރަކާތްތައް އިތުރަށް ފުޅާކޮށް ކުރިއަށް ގެންދިއުމަށް މަގުފަހިވާނެ ކަމަށް އެ ކުންފުނިން ހާމަކުރައްވައެޓެ.
މީގެ އިތުރުން ތިލަމާލެ ބްރިޖުން ހުޅުމާލެ، މާލެ، ވިލިމާލެ، އަދި ގުޅީފަޅު ތިލަފުށްޓާއި ގުޅުވާލެވުމުން މި ސަރަހައްދަށް އިގްތިޞާދީ ގޮތުން އިންގިލާބީ ކުރި އެރުންތަކެއް އަންނާނެ ކަމަށް އެ ކުންފުނިން ހާމަކުރައްވައެވެ.
