ވިހެއުމަށްފަހު ދަރިފުޅު އެއްލައިލި މީހާ ހައްޔަރުކޮށްފި
އދ.ދިގުރަށުގައި ކުޑަކުއްޖަކު ވިހައިފައި، އެއްލައިލި މައްސަލައިގައި މީހަކު ހައްޔަރުކޮށްފިއެވެ.
ދިގުރަށުގައި، ކޮތަޅަކަށްލައި ކުނިގޮނޑަކަށް ތުއްތު ކުއްޖަކު އެއްލައިލައިފައި އޮތް މައްސަލަ ފުލުހުންނަށް ރިޕޯޓު ކުރީ މިއަދު ހެނދުނު 9:20 ހާއިރުއެވެ.
ފުލުހުން ވިދާޅުވީ މި މައްސަލައިގައި، ކޯޓު އަމުރެއްގެ ދަށުން، އުމުރުން 30 އަހަރުގެ ސްރީލަންކާގެ އަންހެނެއް ހައްޔަރުކޮށްފައިވާ ކަމަށެވެ.
ފުލުހުން އޭނާ އަތުލައިގަތީ، ފުރަން މާލެ އައިސް، ވެލާނާ އިންޓަރނޭޝަނަލް އެއާޕޯޓަށް ގޮސް ހުއްޓައި ކަމަށް ވެސް ފުލުހުންގެ މީޑިއާ އޮފިޝަލު ވިދާޅުވިއެވެ.
މި މައްސަލައިގައި އެ ރަށު ގެސްޓްހައުސްއެއްގައި މަސައްކަތް ކުރާ އަންހެނެއްކަން އެނގިފައިވެއެވެ. އަދި މަރުވި ކުއްޖާގެ ފޫޅުވެސް އޮތީ ނުކަނޑައިކަމަށް މަޢުލޫމާތު ލިބެއެވެ.
މިކަން ބެލުމަށް ފުލުހުންގެ ޓީމެއް އަންނަނީ ދިގުރަށުގައި ހަރަކާތްތެރިވަމުންނެވެ.
