ވަކީލަކު ހަމަޖައްސަން އަދީބަށް 10 ދުވަހުގެ މުއްދަތެއް ދީފި
ކުރީގެ ނާއިބު ރައީސް އަހުމަދު އަދީބުގެ މައްޗަށް ދައުލަތުން އުފުލި ހަތް ދައުވާ ވެސް ކްރިމިނަލް ކޯޓުން ބޭރުކޮށްލި މައްސަލައިގެ އިސްތިއުނާފް ޝަރީއަތް ކުރިއަށް ގެންދިޔުމަށް އަދީބަށް ވަކީލަކު ހަމަޖައްސަން 10 ދުވަހުގެ މުއްދަތެއް ކޯޓުން މިއަދު ދީފިއެވެ.
އެމްއެމްޕީއާރުސީ ހިޔާނާތުގެ މައްސަލާގައި އަދީބުގެ މައްްޗަށް ދައުލަތުން އުފުލި ދައުވާތައް ކްރިމިނަލް ކޯޓުން ބާތިލު ކުރި ހުކުމްގެ ހައިކޯޓްގައި ވަނީ އިސްތިއުނާފް ކޮށްފަ އެވެ. އަދި އެ މައްސަލަ ނިމެންދެން އަދީބު ރިމާންޑް ޖަލެއްގައި ބެހެއްޓުމަށް ހައިކޯޓުން ވަނީ ހުކުމް ކޮށްފަ އެވެ.
ބަންދު އަޑުއެހުމުގައި އަދީބު ތަމްސީލު ކުރެއްވީ ވަކީލު މަހުފޫޒު ސައީދު އެވެ. މިއަދު ބޭއްވި އަޑުއެހުމުގައި އަދީބު ވިދާޅުވީ، މަހުފޫޒު ހަމައެކަނި ވަކީލެއްގެ ގޮތުގައި މަސައްކަތް ކުރެއްވީ އޭނާގެ ބަންދުގެ އަޑުއެހުމަށް ކަމަށާއި އޭނާއަކީ މުޅި މައްސަލައިގެ ވަކީލު ނޫން ކަމަށެވެ.
އެހެންކަމުން މައްސަލަ ބައްލަވާ ފަނޑިޔާރު ވަނީ މި މައްސަލަ ކުރިއަށް ގެންދިޔުމަށް އަދީބަށް ވަކީލަކު ހަމަޖައްސަން އެންމެ ގިނަވެގެން ވެސް ދެވޭނީ 10 ދުވަސް ކަމަށް ވިދާޅުވެފައެވެ. އެ ފުރުސަތު އަދީބަށް ދިނުމަށްފަހު މިއަދުގެ އަޑުއެހުން ވަނީ ނިންމާލާފައެވެ.
