ރައީސް ޔާމީނަށް އިންސާފު ލިބުމަކީ ގައުމަށް އެންމެ އިންސާފުވެރި ގޮތް: ރައީސް
ކުރީގެ ރައީސް އަބްދުالله ޔާމީނަށް އިންސާފު ލިބިގެން ދިއުމަކީ މި ގައުމަށް އެންމެ އިންސާފުވެރި ގޮތް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އައްޑޫގައި މިރޭ ކުރިއަށްދިޔަ ޖަލްސާގައި ވާހަކަދައްކަވަމުން ރައީސް ވިދާޅުވީ ޔާމީންގެ ޝަރީއަތްތައް ލަސްވެ ދިގުލައިގެންދާތީ ކަންބޮޑުވާ ކަމަށާއި އިންސާފު ލަސްވެގެން ދިއުމަށް ނޭދޭ ކަމަށެވެ. އަދި އެއީ ގައުމަށް ހަމަޖެހުން އޮތް ގޮތެއް ނޫން ކަމަށް ވެސް ރައީސް ވިދާޅުވިއެވެ.
"އެ މަނިކުފާނަށް ވެސް އިންސާފު ލިބެންޖެހޭނެ. އިންސާފު ލަސްވުމަކީ އިންސާފު ނުލިބުން،" ރައީސް ވިދާޅުވިއެވެ.
ޔާމީންގެ ޝަރީއަތަށް ހުރަސް އަޅާނެ އެއްވެސް މީހަކު މި ސަރުކާރުގައި ނުހުންނާނެ ކަން ފާހަގަކުރައްވައި ރައީސް ވަނީ މި ސަރުކާރު އައިފަހުން ޝަރުއީ ދާއިރާ މިނިވަންވެފައިވާ ކަމަށް ވިދާޅުވާ ވާހަކަ ތަކުރާރު ކުރައްވައިފައެވެ.
އަބަދުވެސް ފެންނަ މަންޒަރަކީ މީގެ ކުރިން ގައުމުގައި ވެރިކަން ކުރައްވައިފައި ތިބި ވެރީންގެ ވެރިކަން ނިމުމާއެކު އެ ބޭފުޅުން ހުރަގެއަށްލާ މަންޒަރު ނަމަވެސް އެ ކަންތައް މި ސަރުކާރުން ނުފެންނާނެ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ އަޅުގަނޑުމެންގެ ގައުމަށް ހަމަޖެހުން އަންނާނީ ގައުމުގައި ބަސްކިޔަން ތިބި ސިޔާސީ ފަރާތްތައް ވެސް މިނިވަންކަމާއެކުގައި މަސައްކަތްކުރުމުގެ ފުރުސަތު ދީގެން ކަމަށެވެ.
ހަމަތަކުގެ ތެރެއިން ރައީސް ޔާމީން މިނިވަންކުރުމަކީ ރައީސްގެ ވައުދެކެވެ. ނަމަވެސް, ޕާޓީގެ އެތެރޭގައި އުފެދުނު ހިޔާލުތަފާތުވުންތަކާއެކު, ޔާމީން ވަނީ ޕާޓީން ވަކިވެވަޑައިގެން އާ ޕާޓީއެއް އުފައްދައިފައެވެ.
