އެމްޑީޕީ މެޖޯރިޓީ ހޯދުމުގެ ފަހަތުގައި އޮތީ އެމްޑީއެންގެ އެޖެންޑާ ނެރުން: ރައީސް
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އިދިކޮޅު އެމްޑީޕީން މަޖިލީހުގެ މެޖޯރިޓީ ހޯދުމުގެ ފަހަތުގައިވަނީ އިސްލަމްދީނުގެ އަސްލުތަކާއިމެދު ސުވާލު އުފައްދާ ކީރިތި ރަސޫލާ ކުޑައިމީސްކޮށް ހެދި މޯލްޑިވިއަން ޑިމްކޮރެސީ ނެޓްވޯކް (އެމްޑީއެން) ޖަމިއްޔާގެ އެޖެންޑާ ނެރުން ކަމަށް ރައީސް ޑރ މުހައްމަދު މުއިއްޒު މިރޭ ތުހުމަތު ކުރައްވައިފިއެވެ.
އެމްޑީއެނުން ދީނަށް ފުރުއްސާރަކޮށްފައިވަނީ ''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ނަމުގައި އެ ޖަމްއިއްޔާ އިން ނެރުނު ރިޕޯޓެއްގައެވެ. މިދިޔަ ސަރުކާރުގައި އެ ރިޕޯޓުގެ މައްސަލަ ވަރަށް ބޮޑަށް ހޫނުވިއެވެ. ޔޫތް މިނިސްޓްރީން އެ ޖަމިއްޔާ އުވާލީ 2019 ވަނަ އަަހަރުގެ ފަހުކޮޅުއެވެ.
''ނަމެއްގައި ޖަމިއްޔާ އުވާލީ، އިފެކްޓްވިލީ ހިނގަމުން ދިޔައީ މިހިރީ ހަނދާނުން ކައްސަލައިގެން ދިޔަޔަސް ހަގީގަތް'' މިރޭ ނ. ހޮޅުދޫ ދާއިރާއަށް ޕީޕީއެމް/ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުގެ ކެމްޕޭނު ޖަގަހަ ހުޅުވުމަށް މާލޭގައި ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވިއެވެ.
އެމްޑީއެން ރިޕޯޓް ހެދުމުގައި ކުރީގެ ޕޮލިސް ކޮމިޝަނަރު މުހައްމަދު ހަމީދުގެ އިތުރުން ރައީސް އޮފީހުގައި މަސައްކަތް ކުރައްވާމުން ގެންދެވި ނޫޝިން ވަހީދުގެ މައްޗަށް ތުހުމަތު ކުރެވުނެވެ. ނަމަވެސް ހަމީދު ކުޑަ ދުވަސް ކޮޅަކަށް އެ ޖަމްއިއްޔާގައި މަސައްކަތް ކުރެއްވި ކަމަށާއި އެކަމަކު ރިޕޯޓް އުފެއްދުމުގައި ބައިވެރިނުވާ ކަަމަށް ފުލުހުން ވަނީ އޭރު ބުނެފައެވެ. ފާޑު ކިޔުންތައް އަމާޒުވުމުން ނޫޝިން ވަނީ އެ ޖަމްއިއްޔާއިން އިސްތިއުފާ ދެއްވިކަން އިއުލާން ކުރައްވައި، ރިޕޯޓް ހެދުމުގައި އޭނާގެ ދައުރެއް ނުވާނެ ކަމަށް ބުނެފައެވެ.
ރައީސް ވިދާޅުވީ ރިޕޯޓު ހެދި މީހުން ތިއްބެވީ ރައްޔިތުންގެ ފައިސާއިން މުސާރަ ނަންގަވައިގެން ކަމަށެވެ. އަދި އެއިން އެއްވެސް މީހަކާ މެދު ފިޔަވަޅެއް އަޅާފައިނުވާކަމީ ކުރި ސަރުކާރުން އެ ޖަމިއްޔާއަށް ތާއިދުކުރުން ކަމަށެވެ.
އެ ފިކުރުގައި (އެމްޑީޕީ) ތިބި ބަޔަކަށް އެހާވަރަކުން ކަން ނޭގެ ބޭނުންވަަނީ އެ މީހުންގެ ބާރު ފަސް އަހަރަށް އިތުރުކުރަން، އެ ފިކުރުގައި ތިބި ބަޔަކަށް އަޅުގަނޑުމެން ޖާގަ ދޭން ޖެހޭ ސަބަބެއް ނިކަން ދައްކަވަން އެބަޖެހޭ
ރައީސް ވިދާޅުވީ ޕޯޑިއަމްތަކުގައި، ނަމާދުކުރަން އެމަނިކުފާނު ރައްޔިތުންނަށް ގޮވާލާމުންދާ ގޮވުންތަކަށް ކިތަންމެ ވަރަކަށް ބަޔަކު މަލާމާތް ރައްދުވިއަސް އެ ވާހަކަ ދައްކަނީ ފަހުރުވެރިކަމާ އެކު ކަމަށެވެ. ގައުމުގެ ކަންތައްތައް ހަމަޔަކަށް އެޅުވުމަށް ދީނަށް ނަސްރު ދޭ މީހުންނަށް ފުރުސަތުދޭން ޖެހޭ ކަމަށެވެ.
މިއީ ވެރިކަމަށް ވަޑައިގެންނެވި ފަހުން ރައީސް، އެމްޑީއެންގެ ވާހަކަ ނެންގެވި ފުރަތަމަ ފަހަރެވެ.
