ކުރީ ސަރުކާރުން މަޝްރޫއުތައް ހަވާލުކުރި ކުންފުނިތައް އުޅެނީ ފިލައިގެން: ރައީސް
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި މަޝްރޫއުތައް ހަވާލުކުރީ ޕާޓީއަށް ނިސްބަތްވާ މީހުންނަށް ކަމަށާއި، މަސައްކަތް ހަވާލުކުރި ކުންފުނިތައް މިހާރު ''ފިލާފައި'' ވާ ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެއެވެ.
ފޭސް ދޭއްގެ ރައްޔިތުންނާ ބައްދަލުކުރައްވަން ޕީޕީއެމް/ޕީއެންސީން ބޭއްވި ޖަލްސާގައި ރައީސް ވަނީ މި ސަރުކާރުން މަޝްރޫއުތައް ހުއްޓާލާފައިވާ ކަމަށް ބުނެ އިދިކޮޅު އެމްޑީޕީން ދައްކަމުންދާ ވާހަކަތަކަށް ރައްދު ދެއްވާފައެވެ. އެމްޑީޕީން ބުނަނީ އެ ޕާޓީގެ ވެރިކަމުގައި ފެށި ހުރިހާ މަޝްރޫއުއެއް ރައީސް މުއިއްޒުގެ ސަރުކާރުން ހުއްޓާލާފައިވާ ކަމަށެވެ.
ރައީސް މުއިއްޒު ވިދާޅުވީ ވެރިކަމާ ހަވާލުވެވަޑައިގެންނެވިއިރު 84 ރަށެއްގެ މަޝްރޫތައް އޮތީ ހުއްޓިފައި ކަމަށެވެ. އޭގެ ތެރޭގައި 17 ރަށެއްގެ މަގުހެދުމުގެ މަޝްރޫއު އާއި ދަނޑުތައް އެޅުމުގެ މަޝްރޫއުއެއް ހިމެނޭ ކަމަށް ވިދާޅުވިއެވެ. އަދި 20 މިސްކިތެއްގެ މަޝްރޫއުއެއް ހުއްޓިފައިވާާކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވި ގޮތުގައި މަޝްރޫއުތައް ހުއްޓިފައި އޮތީ ރަނގަޅަށް މެނޭޖް ނުކުރެވޭތީއެވެ. ނުވަތަ ''މިސް'' މެނޭޖުގެ ސަބަބުންނެވެ.
އެއަށް ފަހު އެމަނިކުފާނު ވިދާޅުވީ ގިނަ މަޝްރޫއުތަކެއް ހަދަން އެގްރީމެންޓުކޮށް، އެޑްވާންސް އަށް ވެސް ފައިސާވެސް ދޫކޮށްފައިވާ ކަމަށެވެ. ނަމަވެސް އެ ކުންފުނިތަކަށް ވާނުވާ ނޭގީ ''ގެއްލޭ'' ކަމަށް ވިދާޅުވިއެވެ. އެމަނިކުފާނު ވިދާޅުވި ގޮތުގައި ގިނަ މަޝްރޫއުތަކެއް ހުއްޓިފައި އޮތް މައިގަނޑު ސަބަބަކީވެސް އެއީއެވެ.
"ޕާޓީގެ ބައެއް ބޭފުޅުންނަށް ފައިސާ ދޭންވެގެން ކުންފުނި ހަދާފަ އެގްރީމެންޓް ހަދާލަނީ. އެޑްވާން ޕޭމެންޓް ދޫކޮށްލަނީ. ދެން އެކުންފުނި ފިލަނީ. އަނެއްކާ އަނެއް ކުންފުނި އަންނަނީ މަޝްރޫއުއާ ހަވާލުވާން. އައިސް އެމީހުންނަށް ވެސް އެޑްވާންސް ޕޭމެންޓް ދެނީ. އެމީހުން ވެސް ދަނީ. އެގޮތަށް ތިން ހަތަރު ފަހަރަށް ހަވާލުކޮށްފަ ހުރި މަޝްރޫއުތައް އެބަހުރި އަޅުގަނޑުމެން ވެރިކަމާ ހަވާލުވީއިރުގައި"
ހިޔާ ޝަހަރުގައި ދިރިއުޅޭ ގިނަ އަދަދެއްގެ ބަޔަކު ބައިވެރިވި އެ ޖަލްސާގައި ރައީސް ވިދާޅުވީ، ހުއްޓާލާފައި އޮތް 71 މަޝްރޫއުއެއް މި ސަރުކާރުން އަލުން ފަށާފައިވާ ކަމަށެވެ. އަދި ބައެއް މަޝްރޫއުތައް މިހާރު ނިންމާލެވިފައިވާ ކަމަށްވެސް ރައީސް ވިދާޅުވިއެވެ.
''މިހާރުވެސް 48 ރަށެއްގެ މަސައްކަތް ކުރެވެމުން އެބަދޭ'' މަޝްރޫއުތަކުގެ އަޕްޑޭޓް ދެއްވަމުން ރައީސް ވިދާޅުވިއެވެ.
އިތުރު މަޝްރޫއުތަކުގެ މައުލޫމާތު ހިއްސާކުރައްވަމުން ރައީސް މުއިއްޒު ވިދާޅުވީ ފައިސާގެ ސަބަބުން، ހުއްޓާލާފައި އޮތް 90 ރަށެއްގެ ތައުލީމީ ދާއިރާގެ މަސައްކަތްތައް އަލުން ފަށައިގަނެވިފައިވާ ކަމަށެވެ. އަދި ކޮންޓްރެކްޓަރަށް ދައްކަން ޖެހޭ ފައިސާ ދައްކާ ހަލާކޮށްފައިވާ ކަމަށެވެ. މި ވަގުތު، ތައުލީމީ ދާއިރާގެ 217 މަޝްރޫއުއެއް މިހާރު ހިނގަމުންދާ ކަމަަށް, މިދިޔަ އަހަރުގެ ނޮވެމްބަރު މަހު ވެރިކަމާއި ހަވާލުވެވަޑައިގެންނެވި ރައީސް މުއިއްޒު ވިދާޅުވިއެވެ.
މިދިޔަ ސަރުކާރުން ތައުލީމީ ދާއިރާގެ މަޝްއުރޫތައް އޮތް ހާލަތު ބަޔާންކޮށްދެމުން ރައީސް ވިދާޅުވީ، ރިޔާސީ ކެމްޕޭނުގައި ރަށްރަށަށް ވަޑައިގެންނެވިއިރު ސްކޫލްތަކުގެ މަލްޓިޕާޕަސް ހޯލާއި، ކްލާސް ރޫމްތަކުގެ ގޮތުގައި ފެނިވަޑައިގެންނެވީ ކޮންކްރީޓް ފްރޭމްވޯކުތަކެއް ކަމަށެވެ. އެއް މަޝްރޫއެއް އެކި ފަހަރު މަތިން އެތައް ބަޔަކަށް ހަވާލުކުރަމުން ގޮސް ގިނަ ފަހަރު 'އޮރިޖިނަލް' ކޮންޓްރެކްޓާވެސް ނޭގޭ ހިސާބަށް ކަންކަން ގޮސްފައިވާ ކަމަށް ވިދާޅުވިއެވެ.
"މިއީ ކަންކަން ކުރިގޮތް. މިއަދު އަޅުގަނޑުމެންގެ ކުރިމައްޗަށް އައިސް ވާހަކަފުޅު ދައްކަވާއިރު ރައްޔިތުންނަށް ކަންކަމެއް އޮޅުވައެއް ނުލެވޭނެ،" އެމްޑީޕީން ރައްޔިތުންނަށް ކަންތައްތައް އޮޅުވާލަމުންދާ ކަމަށް ތުހުމަތުކުރައްވަމުން ރައީސް ވިދާޅުވިއެވެ.
