މާލީގޮތުން ހަރުދަނާވާނީ އެމްޑީޕީގެ ދޯހަޅި ސިޔާސަތުތަކަށް ނޫނެކޭ ބުނެގެން: ލަމްޢާން
ދައުލަތުގެ މާލިއްޔާ ހަރުދަނާ ވާނީ އިދިކޮޅު މައި ޕާޓީ، އެމްޑީޕީގެ ދޯހަޅި އިގްތިސާދީ ސިޔާސަތުތަކަށް ނޫނެކޭ ބުނެގެން ކަމަށް މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ޑެޕިއުޓީ މުހައްމަދު ލަމްޢާން މިއަދު ވިދާޅުވެއްޖެއެވެ.
އެކްސް ގައި ކުރެއްވި ޕޯސްޓެއް ގައި ލަމްޢާން ވިދާޅުވީ، މިހާރުގެ ރައީސް ޑރ. މުހައްމަދު މުއިއްޒުގެ މާލީ ސިޔާސަތު ހަރުދަނާ ވާނެ ކަމަށެވެ. އެހެންކަމުން، ދައުލަތުގެ މާލިއްޔަތު ހަރުދަނާ ވާނީ އެމްޑީޕީގެ ދޯހަޅި އިގްތިސާދީ ސިޔާސަތުތަކަށް "ނޫނެކޭ" ބުނެގެން ކަމަށެވެ.
މިދިޔަ ދައުރުގައި ވެރިކަން ކުރި އެމްޑީޕީއަށް ފާޑުކިޔައި ލަމްޢާން ވިދާޅުވީ، މި ސަރުކާރާ ހަވާލުވިއިރު ބޭރުގެ ދަރަނި ދައްކަން އުފައްދާފައިވާ ޑޮލަރު ރައްކާކުރާ ސޮވެރިން ޑިވެލޮޕްމަންޓް ފަންޑުގައި ހުރީ އެންމެ ދެ މިލިއަން ޑޮލަރު ކަމަށެވެ.
ނަމަވެސް، މި ސަރުކާރުން އެ އަދަދު އިތުރުކޮށްފައިވާކަން އޭނާ ފާހަގަކޮށްފައިވެއެވެ. ވިދާޅުވީ، "ފައިސާ ޗާޕު ނުކޮށް، މަޝްރޫއުތައް ހިންގުމާ އެކު އެ ފަންޑަށް 35 މިލިއަން ޑޮލަރު މި ސަރުކާރުން މިހާރު ޖަމާކޮށްފައި ހުންނާނެ،" ކަމަށެވެ.
މިދިޔަ މަހު އަތޮޅު ތެރެއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރެއްވި ދަތުރުފުޅުގައި، ރ. އަލިފުއްޓަށް ވަޑައިގެން އެރަށު ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވީ، މިދިޔަ މަހުގެ ނިޔަލަށް 30 މިލިއަން ޑޮލަރު އެ ފަންޑަށް ޖަމާކުރެވިފައިވާ ކަމަށެެވެ. އަދި މި އަހަރު ނިމޭއިރު އެ ފަންޑުގައި 100 މިލިއަނަށްވުރެ ގިނައިން ޑޮލަރު ހުންނާނެ ކަމަށެވެ.
އިގްތިސާދީ ތަރައްގީ އާއި ވިޔަފާރިއާ ބެހޭ ވުޒާރާއިން އޭރު ހާމަކޮށްފައިވާ ގޮތުގައި ރައީސް ވެރިކަމާ ހަވާލުވެވަޑައިގެންނެވިއިރު ސޮވެރިން ޑިވެލޮޕްމަންޓް ފަންޑުގައި ހުރީ ދެ މިލިއަން އެމެރިކާ ޑޮލަރާއި 2.4 މިލިއަން ދިވެހި ރުފިޔާ ކަމަށެވެ.
