ފުރަތަމަ ފަހަރަށް ކަރަންޓު ބިލުން ''ރޯދަ ޑިސްކައުންޓް''، ޝޯޝަލް މީޑިއާގައި ތައުރީފް!
އަބަދުވެސް އިވެނީ ރޯދަ މަހު ކަރަންޓު ބިލްތައް ބޮޑުވެގެން އާންމު ރައްޔިތުންގެ ޝަކުވާގެ އަޑުތަކެވެ. މީސްމީޑިއާގެ ޕޯސްޓު ތަކުގައި ވެސް އެންމެންވެސް ދައްކާ އެއް ވާހަކައަކަށް ވެފައި އޮންނަނީ ކަރަންޓު ބިލު ބޮޑުވާ ވާހަކައެވެ. ނަމަވެސް، މިއަހަރު ފެނުނީ ތަފާތު މަންޒަރެކެވެ.
ކަރަންޓު ބިލްތަކުން ފުރަތަމަ ފަހަރަށް "ރޯދަ ޑިސްކައުންޓް" ދޭން ފެށުމުން އެންމެން ވެސް އެކަމާ ހިތްހަމަޖެހިގެން، ތައުރީފުގެ ބަސްތައް މީސްމީޑިއާ ގައި ޕޯސްޓްކުރަން ފެށިއެވެ.
ރަމަޟާން މަހުގެ ޑޮމެސްޓިކް ކަރަންޓް ބިލަށް ރައްޔިތުން ބޮޑު ހޭދައެއް ކުރަންޖެހޭތީ، އެ ކަމަށް ރައްޔިތުންނަށް ހައްލެއް ހޯދައިދިނުމުގެ ގޮތުން އާންމު މަހެއްގައި ހުންނަވަރަށް ރަމަޟާން މަހުގެ ކަރަންޓާއި ފެންބިލު ހުންނާނެ ގޮތަށް ކަންކަން ހަމަޖައްސަވައި ދެއްވާނެކަމަށް ރައީސުލްޖުމްހޫރިއްޔާ ޑރ، މުހައްމަދު މުއިއްޒު ވަނީ ވައުދުވެވަޑައިގެންފައެވެ. އެގޮތުން މި އަހަރުގެ ރަމަޟާން ކަރަންޓާއި ފެން ބިލުން އާންމު މަހަކަށްވުރެ އިތުރުވާ އަދަދަށް "ރަމަޟާން ޑިސްކައުންޓް" ދިނުމަށް ހަމަޖެއްސިއެވެ.
މި އަހަރުގެ ރަމަޟާން މަހުގެ ކަރަންޓު ބިލުތަކުން ވަނީ ޑިސްކައުންޓް ދީފައެވެ. މިކަމާއި ގުޅިގެން ކަރަންޓު ބިލްގެ ފޮޓޯ ހިއްސާކޮށް އެކްސްގައި މީހަކު ކުރި ޕޯސްޓެއްގައި ބުނެފައިވަނީ އިގްތިސާދު އަނދަވަޅެއްގައި އޮއްވާ ގައުމު ކޮޅަށް ޖަހަމުން މި ސަރުކާރުން ފުރަތަމަ ފަހަރަށް ކަރަންޓް ބިލުން ރަމަޟާން ޑިސްކައުންޓް ދީފައިވާ ކަމަށެވެ.
އަދި ބިލްގެ ފޮޓޯ ހިއްސާކޮށް، ޑިސްކައުންޓް ދީފައިވާ ވަރު ހައިލައިޓް ކޮށްފައިވެއެވެ. އެ ބިލުން ޑިސްކައުންޓްގެ ގޮތުގައި ހާހަކަށް ވުރެ ގިނަ ރުފިޔާ އުނިކޮށް ދީފައިވެއެވެ.ޑިސްކައުންޓް ދީފައިވަނީ މާޗު މަހުގެ ބިލުންނެވެ.
އިތުރު މީހަކު އެކްސްގައި ކުރި ޕޯސްޓެއްގައި ބުނީ، ރަމަޟާން މަހާއި ދިމާކޮށް ކަރަންޓު ބިލުން ޑިސްކަައުންޓް ދިނުމަކީ މި ސަރުކާރުން ކުރި ވިސްނުންތެރި އަމަލެއް ކަމަށެވެ. އަދި މި މަސައްކަތް ކުރިއަށް ގެންދިއުމަށް ފެނަކައިން ދީފައިވާ އެއްބާރުލުން ފާހަގަކޮށް ޝުކުރު އަދާކޮށްފައިވެއެވެ.
